Ian Martin hasoru Mari Alkatiri ko’alia kona-ba filme dokumentáriu rezisténsia
DILI, 05 Outubru 2026 (TATOLI)—Antigu Xefe United Nation Mission in East Timor (UNAMET), Ian Martin, Segunda ne’e, hasoru malu ho Antigu Primeiru-Ministru, Mari Alkatiri hodi ko’alia kona-ba filme dokumentáriu rezisténsia Timor-Leste, hahú husi 1975-1999 ne’ebé lansa ona iha Timor Plaza, foin lalais ne’e.
“Ha’u-nia vizita mai Timor-Leste iha kontetu filme dokumentáriu (Rezisténsia 1975-1999) ne’ebé mak lansa ona iha Dili International Film Festivál (DIFF) no sei loke tan fali iha Muzeu no Arkivu Rezisténsia Timorense. Entaun, ema barak mak envolve iha dokumentáriu ne’e. Husi ema sira ne’e, ida mak Señor Mari Alkatiri. Ita konta hikas momentu sira ne’ebé mak ha’u mós hola parte iha 1999,” Ian Martin hateten ba Jornalista sira hafoin hasoru malu ho Mari Alkari, iha Rezidénsia Eis Titulár Farol.
Notísia relevante : Ian Martin: Filme ‘Rezisténsia 1975-1999’ hanorin jerasaun foun komprende istória luta ba liberdade
Ian Martin nia prezensa iha Timor-Leste ne’e la’ós vizita Estadu, maibé hanesan vizita pesoál.
Iha fatin hanesan, Antigu Primeiru-Ministru, Mari Alkatiri, hateten, molok Ian Martin sai reprezentante UNAMET nian, molok ne’e nia hanesan ativista.
“Nia mós la espera ha’u atu sai Primeiru-Ministru no ha’u mós la espera nia atu sai reprezentante Nasaun Unidas. Tanba ne’e, enkontru ne’e atu hanoin ba oin oinsá atu istória ne’e bele hakerek loloos para sira mós bele kontribui ba memória rezisténsia,” nia akresenta.
Mari dehan, iha hasoru malu ne’e lakoalia kona-ba kestaun seluk, liliu luta ba nasaun tanba ne’e internu, maibé ko’alia de’it kona-ba filme rezisténsia Timor-Leste.
“Tanba iha filme ne’e ha’u mós iha ne’ebá, tanba ne’e nia (Ian Martin) mai ko’alia ho ha’u. Ha’u seidauk haree filme ne’e maibé halo ona lansamentu iha Timor Plaza, ha’u la bá, Muzeu Rezisténsia mós ha’u la bá, ha’u iha razaun tanba saida mak ha’u la bá, ha’u esplika ba nia,” nia tenik.
Jornalista : Natalino Costa
Editora : Julia Chatarina
