Xefe Suku Bobometo iha Oésilo espera Governu konstrui ponte ba mota Noél-Ekat
OEKUSI, 05 Outubru 2026 (TATOLI) – Xefe Suku Bobometo iha sub-rejiaun Oésilo Rejiaun Administrativa Espesiál Oekusi Ambeno (RAEOA), José Labi Caet, prefere Governu presiza aselera ona atu konstrui ponte Noél-Ekat, nune’e bele fasilita movimentu komunidade no transporte sira ho seguru iha tempu udan.
Autoridade lokál ne’e, propoin perante atividade Mídia Tour ne’ebé organiza husi Uniaun Profisaun Jornalista Timor-Leste (UPJTL), iha sede suku Bobometo, ohin.
“Ha’u kontente tanba tinan ne’e, kompañia Waskita Karya planu ona atu konstrui ponte iha mota Noél-Ekat, no sei aumenta estrada metru-500 atu mai to’o Tumin, tanba estrada husi Oésilo sentru mai mota Noél-Ekat hahú nahe ona alkatraun, bainhira mota ona ponte ha’u kontente tebes tanba komunidade sira sei asesu ba mai seguru,” nia hateten
Lideransa komunitáriu ne’e, kompara kondisaun estrada sira iha suku Bobometo, antes no agora, iha mudansa ona, maske konstrusaun sira-ne’e hamosu rai-rahun, maibé bainhira dezenvolvimentu tama iha suku nia efeitu no empreza mós dalaruma halo intervensaun hodi rega.
Notísia relevante:Primeiru-Ministru orienta autoridade RAEOA prepara dezeñu harii ponte iha mota Noel-Ekat
Rekorde fali katak, antes ne’e Diretór Servisu Rejionál Obra Públika Oekusi, Remigío Nuno Sila, informa, katak, iha mandate anteriór Autoridade RAEOA ho Ajénsia Dezenvolvimentu Nasionál, Institutu Públiku (ADN,I.P) hamutuk ho empreza PT.Waskita Karya iha konkordánsia legál atu aumenta projetu adiosionál kilometru haat ba projetu estrada hosi Tono ba Oésilo.
Desizaun koletiva ne’e tanba bazeia ba valór kontratu ba projetu estrada hosi Tono ba Oésilo bo’ot liu, empreza Waskita Karya ezekuta projetu referida ho distansia kilometru 17, hahú husi Tono suku Cunha sub-rejiaun Pante Makasar to’o fronteira Oésilo suku Bobometo sub-rejiaun Oésilo kompara ho nia verba millaun $33-resin.
Tanba ne’e, iha mandantu Prezidente Autoridade Sesante, Rogério Tiago Lobato, rekomenda presiza halo revizaun ba Bill of Quantity (BoQ) hodi aumenta projetu adisionál kilometru haat, hahú hosi Oésilo to’o mota Noél-Ekat inklui konstrusaun ponte iha mota Noél-Ekat.
Notísia relevante:Projetu adisionál kilometru haat iha Oésilo, Waskita hahú asfáltika ba Noél-Ekat
Entretantu, kompañia Internasionál PT. Waskita Karya, ezekuta projetu estrada nasionál ne’e hahú husi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 17, ezekuta ho valór kontratu millaun $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.
Notísia relevante:Waskita sei ezekuta projetu adisionál kilometru haat iha Oesilo inklui ponte Noél-Ekat
Jornalista: Abílio Elo Nini
Editór: Rafael Ximenes de A. Belo
