Ministru Nino Pereira hakarak revitaliza Merkadu Manleuana no Taibesi
DILI, 06 Outubru 2026 (TATOLI)–Ministru Komérsiu no Indústria, Filipus Nino Pereira iha planu atu revitaliza Merkadu Manleuana no Taibesi tanba kondisaun merkadu la sufisiente ona hodi akomoda negosiante sira.
“Merkadu Manleuana ho Taibesi ne’e husi tinan 2024 to’o 2025 Ministériu Komérsiu no Indústria (MKI) mak halo hela manutensaun, maibé agora iha planu atu revitaliza merkadu, ita alarga tan kondisaun merkadu ne’e tanba ita haree la sufisiente ona. Negosiante barak ona, fatin la to’o atu sira fa’an sasán ona, balun fa’an loos iha trotoár leten ne’e,” Ministru Nino Pereira hateten ba Ajénsia TATOLI iha Bebora, Tersa ne’e.
Notísia relevante : PLP sujere fó apoiu rekuperasaun ba vítima inséndiu iha Merkadu Taibesi
Nia nota, negosiante lubuk ida iha Dili laran mak muda bá-mai hodi okupa espasu públiku.
“Ministériu halo levantamentu dadus hotu ona inklui estudu viabilidade ne’e mós ami finaliza ona,” nia akresenta.
MKI iha tempu badak sei haree atu muda negosiante ho di’ak bá fatin própriu.
“Iha tempu besik ami sei haree, vendedór sira ita sei muda sira ho di’ak, ida-ne’e orsamentu iha fundu infraestrutura,” nia subliña.
Revitalizasaun merkadu ne’e ho objetivu atu kria kondisaun di’ak liután ba negosiante sira no ordena espasu públiku iha kapitál Dili.
Jornalista : Hortêncio Sanchez
Editora : Julia Chatarina
