PLP sujere fó apoiu rekuperasaun ba vítima inséndiu iha Merkadu Taibesi
DILI, 29 Setembru 2026 (TATOLI)-Deputada Partidu Libertasaun Populár (PLP), Maria Angelina Sarmento Lopes, husu ba Governu atu fó apoiu rekuperasaun ba negosiante sira ne’ebé sai vítima ba inséndiu iha Merkadu Taibesi.
Inséndiu ne’e akontese tanba kauza husi sirkuitu eletrisidade, ne’ebé rezultadu vítima 150-resin la konsege salva sasán no osan ho montante boot.
Iha vizita horisehik, deputada Maria Angelina iha merkadu ne’e hodi observa situasaun vítima sira no husu ba Autoridade Munisípiu Dili atu orienta ekipa jestaun merkadu halo levantamentu dadus ba negosiante sira.
“Husu MKAE [Ministériu Koordenadór ba Asuntu Ekonómiku] atu serbisu ho munisípiu Dili haree took pakote rekuperasaun ruma ba sira hodi hadi’a sira-nia ekonomia, tanba ho inséndiu ne’e implika ba sira-nia rendimentu, sirkulasaun ekonómika”, nia levanta iha reuniaun plenária Parlamentu Nasionál, ohin.
Deputada ne’e preokupa ho merkadu ne’ebé dezorganizadu, la ijiene, espasu la to’o, estasionamentu transporte okupa hotu husi negosiante no falta bee-moos.
Reprezentante povu ne’e sujere atu kria kondisaun no halo jestaun hodi impoin regra ho rigorozu. Nia solisita atu presiza reorganiza merkadu ne’e sai merkadu modernu hodi fa’an sasán tuir produtu idaidak nian, iha ijiene, organiza no kria espasu konfortavel ba konsumidór bá halo kompra.
Aleinde ne’e husu atu kria regra obrigatória ba negosiante sira atu labele te’in no hela iha merkadu laran.
“Presiza dignifika negosiante sira, tanba sira mós kontribui ba hadulas rona ekonomia mikro iha país no sai fuan ba ekonomia povu ki’ik nian hodi hamenus dependénsia ekonomia ba setór públiku”, nia afirma.
Deputadu Partidu Demokrátiku (PD), Mariano Malik, reforma mós atu Governu presiza fó apoiu ba vítima negosiante sira.
Lembra katak ahi-han Merkadu Taibesi iha loron 26 kalan ne’ebé rezulta uma 20 motuk, morizada neen no sasán importante seluk ahi han hotu.
Notísia relevante: Inséndiu iha Merkadu Taibesi, APC identifika kauza husi sirkuítu eletrisidade
Jornalista: Nelson de Sousa
Editora: Maria Auxiliadora
