Timor-Leste no Malázia hametin kooperasaun iha área komunikasaun sosiál
DILI, 06 Outubru 2026 (TATOLI)–Sekretáriu Estadu Komunikasaun Sosiál, Expedito Dias Ximenes, hasoru malu ho Embaixadór Malázia iha Timor-Leste, Fairuz Rozali, hodi diskute hametin kooperasaun iha área komunikasaun sosiál.
“Sorumutu ne’e ko’alia kona-ba kontinuidade kooperasaun entre Ajénsia Notisioza Malázia, BERNAMA no Ajénsia TATOLI ne’ebé hahú ona antes,” Sekretáriu Estadu hateten ba Jornalista sira hafoin ramata enkontru, iha Gabinete Sekretaria Estadu Komunikasaun Sosiál, Palásiu Governu, Tersa ne’e.
Kooperasaun ne’e foka ba troka notísia no kontéudu informativu kona-ba dezenvolvimentu nasaun rua nian.
“Enkontru ne’e ami mós planeia atu haluan tan kooperasaun ba Rádiu Televizaun Timor-Leste (RTTL) ho Rádiu Televizaun Malázia hodi fahe programa, esperiénsia téknika no jestaun transmisaun públika,” nia akresenta.
Notísia relevante : Delegasaun BERNAMA vizita TATOLI hodi fortalese parseria iha área mídia nian
Aleinde ne’e, Sekretáriu Estadu no Embaixadór Malázia diskute mós kona-ba formasaun no interkámbiu jornalista. Programa ne’e ho objetivu atu kapasita jornalista Timor-Leste iha área kobertura diplomátika, ekonomia no teknolojia komunikasaun moderna.
“Ita husu apoiu Malázia nian ba preparasaun Timor-Leste nu’udar uma-na’in ba Simeira ASEAN iha tinan 2029. Apoiu ne’ebé presiza liuliu formasaun jornalista hodi asegura kobertura profisionál no kualidade ba eventu internasionál ne’e,” nia tenik.
Embaixadór Malázia hatudu kompromisu atu kontinua apoia Timor-Leste iha prosesu dezenvolvimentu mídia no komunikasaun sosiál.
Jornalista : Hortêncio Sanchez
Editora : Julia Chatarina
