BSI apoiu formasaun tékniku kona-ba akreditasaun ISO/IEC 17025 ba IQTL
DILI, 07 Outubru 206 (TATOLI) – British Standards Institution (BSI) husi Reinu Unidu disponibiliza formasaun téknika laboratoriál nian ba funsionáriu na’in-16 husi Institutu Kualidade Timor-Leste (IQTL, sigla portugés) hodi foka ba akreditasaun laboratóriu ai-han no bebida nian ba ISO/IEC 1725.
Nia esplika ISO/IEC 1725 maka padraun internasionál prinsipál ne’ebé espesifika hanesan rekizitu jerál sira ba kompeténsia, imparsialidade, no operasaun konsistente husi laboratóriu sira teste, amostrajen no kalibrasaun nian. Tanba ne’e, formasaun kona-ba ISO/IEC 17025 ne’e nu’udar parte ida IQTL ninia preparasaun ba akreditasaun laboratóriu tuir padraun internasionál.
Formasaun ne’ebé hala’o durante loron rua, entre 07-08 Outubru 2026, ne’ebé apoiu husi peritu sira husi BSI no hetan partisipasaun husi tékniku IQTL 16.
Jerente Unidade Negósiu BSI, Dedy Pabelu, haktuir katak formasaun ne’e ho objetivu atu hasa’e partisipante sira-nia kompriensaun kona-ba rekizitu oioin ne’ebé kontein iha ISO/IEC 17025:2017 no sira-nia aplikasaun iha atividade laboratóriu.
“Objetivu husi formasaun loron rua ne’e oinsá atu komprende rekizitu husi edisaun ikus 2017 husi ISO/IEC 17025. Espera katak partisipante sira bele komprende rekizitu no kláuzula sira ne’ebé kontein iha padraun ISO/IEC 17025:2017”, Dedy Pabelu hatete ba Tatoli.
Nia dehan omprende kona-ba rekizitu sira husi ISO/IEC 17025:2017 ne’e importante tebes tanba partisipante sira la’ós de’it komprende padraun teórika, maibé mós bele aplika iha serbisu fatin.
Formasaun ne’e kobre hotu husi istória no dezenvolvimentu ISO/IEC 17025, termu no definisaun sira ne’ebé uza, konseitu no estrutura xave sira, ezijénsia padraun sira, dokumentasaun sistema laboratóriu nian, no hala’o avaliasaun lakuna nian hodi avalia konformidade ho ISO/IEC 17025:2017.
“Benefísiu maka, klaru, bele implementa ISO/IEC 17025 iha serbisu fatin, partikularmente iha laboratóriu sira, tantu laboratóriu sira teste nian komu kalibrasaun nian iha IQTL”, nia esplika.
Liuhusi treinamentu ne’e, partisipante sira mós hein atu komprende rekizitu sira bazeia ba enkuadramentu jestaun kualidade ba implementasaun prátika laboratóriu ne’ebé di’ak, inklui konfidensialidade, integridade, no kumpre rekizitu kliente no parte interesada sira-nian.
Aleinde ne’e, partisipante sira ekipadu ho koñesimentu no abilidade sira atu identifika benefísiu sira husi sistema jestaun laboratóriu nian, komprende konseitu no prinsípiu xave sira husi ISO/IEC 17025, aplika rekizitu xave sira husi ISO/IEC 17025:2017, no hala’o no prepara relatóriu sira análize lakuna nian.
Vogál III husi Departamentu Kualifikasaun no Asuntu Internasionál iha IQTL, Tolentino Guterres, afirma katak formasaun BSI ne’e nu’udar parte ida husi esforsu IQTL nian hodi prepara rekursu umanu hodi apoia laboratóriu sira hodi kumpre padraun ISO/IEC 17025, tanba daudaun ne’e laboratóriu kona-ba hahán no bebida nian mós daudaun iha hela faze konstrusaun hela.
Tolentino esplika katak atividade ne’e nu’udar formasaun dahuluk iha IQTL nia prosesu ba akreditasaun ISO/IEC 17025.
Tuir nia, IQTL inisialmente foka liu ba preparasaun laboratóriu ai-han no bebida nian molok dezenvolve liután padraun ne’e nia aplikasaun ba atividade laboratóriu sira seluk.
“Ami iha espetativa pozitiva tebes ba implementasaun iha futuru, tanba ne’e maka IQTL primeira vez hakat ba padraun ISO/IEC 17025. Ami-nia foku prinsipál maka iha laboratóriu hahán no bebida nian”, nia hatete.
Dirijente ne’e dehan katak aumentu kapasidade ne’e sei suporta IQTL iha prestasaun servisu no halo monitorizasaun ba teste laboratóriu iha Timor-Leste.
Nia espera katak durante loron rua ne’e formasaun bele la’o ho di’ak tanba ida-ne’e sai hanesan pasu dahuluk ba IQTL hodi hasa’e ninia kapasidade téknika no harii sistema laboratóriu ne’ebé prienxe rekizitu ISO/IEC 17025:2017 hanesan parte ida husi prosesu akreditasaun.
Notísia relevante: IQTL lansa fatuk dahuluk ba konstrusaun Laboratóriu Ai-han no Bebida
Jornalista: Arminda Fonseca
Editora: Maria Auxiliadora
