UPJTL felisita estudante ETV Pássabe ne’ebé inísia knaar jornalizmu ho jornál parede
OEKUSI, 06 Outubru 2026 (TATOLI) – Uniaun Profisaun Jornalista Timor-Leste (UPJTL), tersa ohin, kontinua hala’o atividade Mídia Tour ba loron daruak, hodi sensibiliza importánsia Literásia Mídia sosiál iha Eskola Tékniku Vokasionál (ETV) São João Paulo II, ne’ebé lokaliza iha suku Abani sub-rejiaun Pássabe Rejiaun Administrativa Espesiál Oekusi Ambeno (RAEOA).
Iha sorumutu ho estudante no manorin sira, Prezidente UPJTL, Horacio Babo, senti orgullu, tanba molok hakat atu tama ba áreadór eskola, haree kedas kuadru iha eskola oin, nakonu ho surat-tahan mutin maka jornál parede.
“Ohin ha’u tama mai, ha’u haree buat ida kapa’as tebes, iha kuadru informasaun no téknolojia jornál parede, parabens ba estudante sira, tanba eskola barak iha Timor-Leste maibé iha eskola ida ka rua mak halo hanesan ETV Pássabe, ida-ne’e maka servisu jornalizmu nian, rekolla informasaun, foto halo vidio, depois hakerek mak foin públika, parabéns tanba imi hahú hala’o ona kna’ar jornalista ne’e bainhira sei eskola hela,” nia hateten perante sorumutu ho estudante sira iha salaun ETV Pássabe, ohin.
Tanba ne’e, Prezidente UPJTL ne’e enkozara estudante sira, bainhira utiliza plataforma mídia sosiál sira hodi kontinua públika tutan iha jornál parede, presiza tau importansia ba buat tolu;
- Primeiru verifikasaun informasaun no koñese autór públikasaun ho kalándariu atualizasaun
- Verifika informasaun ho dadus detallu.
- Molok públika ka fahe tutan, presiza verifika didi’ak, tanba bainhira públika ona ba públiku ho informasaun laloos bele kontribui ona ba informasaun falsu sira.
“Bainhira atu sai jornalizmu ka atu hatene buat barak liliu informasaun no públikasaun, tenki lé barak, no rekolla faktus ho verifikasaun,” nia fó hanoin.
Notísia relevante:UPJTL kontinua sosializa importánsia jornalizmu ba estudante sira iha Eskola Bázika Terseiru Siklu Pásabe
Batista Lafo nu’udar profesór iha EVT São João Paulo II Pássabe, informa, ejisténsia jornál parede ne’e iha eskola, kuaze tinan tolu ona, ho objetivu atu eduka estudante atu espresa opiniaun, puizia no atikél liuhusi jornal parede ne’e ho lian, tetun, portugés, inkles no lian melayu nian.
“Primeira-véz ami hetan vizita husi jornalista sira mai iha ami nia eskola, hodi mai fahe informasaun importante tebes kona-ba kna’ar jornalizmu no oinsa utiliza literásia mídia sosiál, nu’udar manorin, ami apresiza tebes tanba ohin ami bele hetan tan informasaun barak ba estudante sira atu haatene klean liu tan kona-ba servisu jornalismu nian, karik durante ne’e ami hala’o ka hanoin ladun klean, maibé agradese tebes, ohin bele hetan referénsia balun,” nia hateten.
Romariu da Cruz Nesi, nu’udar estudante haksolok, tanba liuhusi atividade Mídia Tour, aumenta koñesimentu ho materia balu relasaun ho servisu jornalizmu nian.
“Liuhusi prezensa mídia sira ohin, ami bele aprende ona buat foun balun liliu literásia mídia sosiál, motivasaun ohin ha’u hetan husi Prezidente UPJTL maka tenki le barak no molok konsumu informasaun ruma tenki verifika uluk, ida-ne’e interesante ba ami nu’udar atu utiliza mídia sosiál karik ho di’ak no fó duni benefisíu,” nia hateten.
Notísia relevante:UPJTL halo Media Tour bá Bobometo, kobertura no literasia mídia sai alvu
Entretantu, atividade Mídia Tour ne’ebé organiza husi UPJTL, hala’o ona iha loron segunda-feira, 05 Setembru hahú uluk iha suku Bobometo sub-rejiaun Oésilo no loron daruak kontinua iha suku Abani sub-rejiaun Pássabe no tuir planu iha loron datoluk sei hala’o vizita no audénsia ho Autoridade RAEOA.
Jornalista: Abílio Elo Nini
Editór: Rafael Ximenes de A. Belo
