Atleta Teofilo Freitas: “Ami la promete sai mampiaun, maibé sei hatudu kapasidade”
DILI, 08 Outubru 2026 (TATOLI)–Atleta para-atletizmu, Teofilo Freitas, hateten, nia ho atleta seluk ne’ebé hetan konfiansa reprezenta Timor-Leste iha Asian Para Games la promete sai kampiaun maibé sei hatudu kapasidade iha kampu.
“Eventu Asian Para Games ne’e eventu ne’ebé boot no ami na’in-haat ne’ebé hetan konfiansa tuir provas prestasaun ne’ebé ami halo iha Tailándia tinan kotuk, no ami na’in-haat la promete atu sai kampiaun maibé ami simu konfiansa ne’e ho responsabilidade hodi kompete ho ami-nia kapasidade tomak hodi reprezenta Timor-Leste iha eventu refere,” Teofilo hateten ba Ajénsia TATOLI via telefónika, Kinta ne’e.
Notísia relevante : Atleta Abelita Borges otimista bele hatudu jogu di’ak iha Nagoya
Tuir ajenda, Asian Para Games ba dalimak, Aichi-Nagoya 2026 sei realiza iha Aichi no Nagoya, Japaun iha loron 18 to’o 24 Outubru 2026.
Nagoya sai sidade dahuluk iha Japaun ne’ebé sai uma-na’in ba Asian Para Games. Eventu ne’e sei partisipa husi nasaun 45 ho modalidade 18 no eventu hamutuk 492.
Atleta na’in-haat ne’ebé hetan esperiénsia internasionál iha Tailándia tinan kotuk iha modalidade para-atletizmu mane na’in-tolu no para-ténis-meza feto na’in-ida sei hatudu sira-nia abilidade iha kampu.
Kontinjente Timor-Leste sei aranka ba Japaun iha loron 09 Outubru 2026 no sei fila iha rohan Outubru.
Jornalista : Hortêncio Sanchez
Editora : Julia Chatarina
