Atleta Abelita Borges otimista bele hatudu jogu di’ak iha Nagoya
DILI, 07 Outubru 2026 (TATOLI)–Atleta para-ténis-meza Timor-Leste, Abelita Borges, hateten, maski preparasaun hodi hasoru Asian Para Games iha Nagoya, Japaun iha Outubru ne’e ladun másimu, maibé nia fiar sei hatudu jogu di’ak.
Ministru Juventude, Desportu, Arte no Kultura, Nelio Isaac Sarmento despede atleta na’in-haat no ofisiál hamutuk ema na’in-10 ne’ebé sei desloka ba Nagoya.
“Ha’u sente preparasaun ladún másimu tanba ami hala’o preparasaun fulan-rua de’it iha TC tanba Governu nia esforsu mak hanesan ne’e ona, ha’u nu’udar atleta simu, maibé ha’u fiar katak ho esforsu ha’u bele avansa iha jogu ne’e,” Abelita hato’o ba Ajénsia TATOLI, hafoin serimónia despedida, iha edifísiu Ministériu Juventude, Desportu, Arte no Kultura (MJDAK), Bidau Lesidere, Kuarta ne’e.
Notísia relevante : Atleta paralímpiku na’in-haat sei partisipa Asian Para Games iha Japaun
Nia dehan, atleta timoroan sei kompete ho nasaun 45, tanba ne’e nia la promete medalla maibé sei esforsu ho másimu.
“Ha’u la promete ba Governu atu lori medalla mai iha ita-nia nasaun Timor-Leste tanba nasaun 45 la fasil, maibé fiar katak sei hatudu jogu ne’ebé di’ak iha Asian Para Games Nagoya, Japaun,” nia akresenta.
Iha mensajen despedida, Ministru Nelyo Isaac Sarmento, hateten partisipasaun iha kontinjente ne’e nu’udar parte husi esforsu Governu atu kontinua dezenvolve desportu inklusivu hodi fó oportunidade ba ema ho defisiénsia atu partisipa no reprezenta Timor-Leste liuhusi desportu.
Governante ne’e dehan, atleta sira ne’e iha esperiénsia iha kompetisaun internasionál no partisipa ona iha eventu sira antes, inklui kompetisaun iha Tailándia.
Tanba ne’e, nia hein katak preparasaun ne’ebé atleta sira hala’o iha rai-laran bele ajuda sira atu hadi’a no aumenta sira-nia abilidade individuál.
Kontinjente ne’e sei reprezenta Timor-Leste iha modalidade para-atletizmu no para-ténis-meza, ho atleta mane na’in-tolu iha para-atletizmu no atleta feto na’in-ida iha para-ténis-meza.
“Ita hotu nia hakarak mak atu sira bele halo tan prestasaun di’ak iha eventu internasionál ida-ne’e,” Ministru Nelyo, hato’o.
Ministru mós hato’o nia esperansa no apoiu ba atleta sira atubele halo prestasaun di’ak no lori naran Timor-Leste iha eventu internasionál ne’e.
Nia mós apela ba komunidade ema ho defisiénsia ne’ebé seidauk envolve iha atividade desportu, atu aproveita oportunidade sira iha área desportu.
Iha tempu hanesan, Ministru husu ba Komité Paralímpiku Timor-Leste atu kontinua buka no dezenvolve atleta foun, hodi asegura regenerasaun atleta no kontinuidade ba dezenvolvimentu desportu paraolímpiku iha Timor-Leste.
Kontinjente Timor-Leste sei sai ba Japaun iha 09 Outubru 2026 no sei filafali iha rohan Outubru.
Partisipasaun ema ho defisiénsia iha modalidade desportu konsidera nu’udar parte importante husi esforsu atu hametin dezenvolvimentu desportu inklusivu iha Timor-Leste.
Jornalista : Hortêncio Sanchez
Editora : Julia Chatarina
