Atleta paralímpiku na’in-haat sei partisipa Asian Para Games iha Japaun
DILI, 13 Agostu 2026 (TATOLI)—Governu liuhusi Ministériu Juventude, Desportu, Arte no Kultura (MJDAK) lansa ofisialmente atleta Paralímpiku na’in-haat ne’ebé sei reprezenta Timor-Leste compete iha eventu Asian Para Games iha Japaun, iha Outubru 2026.
Serimónia lansamentu ne’e hala’o iha edifísiu Konfederasaun Desportiva Timor-Leste (CDTL), Dili, kuarta (loraik.
Diretór Jerál Desportu MJDAK, David Tomas de Deus, hateten lansamentu ne’e hala’o tanba iha fulan-outubru atleta sira sei ba Japaun hodi kompete.
“Ita mai halo lansamentu ba atleta Paralímpiku sira tanba iha fulan-outubru sira sei ba Japaun hodi kompete iha eventu Asian Para Games, entaun Timor-Leste ita haruka atleta na’in-haat. Para Atletizmu na’in-tolu no Para Tenis na’in-ida,” David Tomas de Deus ba jornalista sira iha lansamentu ne’ebé hala’o iha edifísiu Konfederasaun Desportiva Timor-Leste (CDTL), Dili, kuarta (12 Agostu 2028) ne’e.
Nia esplika, durante ne’e atleta sira halo formasaun iha sira ida-idak nia fatin no agora MJDAK tau sira hamutuk iha Otel durante fulan-rua hodi halo treinamentu sentralizadu.
“Durante ne’e sira halo formasaun iha sira ida-idak nia fatin, maibé agora ita tau sira hamutuk, durante fulan-rua ne’e sira hela iha otel atu treinu hamutuk, atu nune’e bele hatudu rezultadu di’ak iha eventu ne’e,” nia dehan.
David subliña katak Asian Para Games ne’e eventu internasionál boot ho nasaun kuaze 45 mak partisipa. Nia fiar katak atleta sira ne’ebé hili ho rekor di’ak sei hatudu prestasaun ba povu Timor-Leste.
“Ita hotu espera katak sira bele hatudu prestasaun iha eventu ne’e,” nia dehan.
“Atleta sira ita hili ne’e iha rekor ne’ebé mak di’ak, fiar katak sira sei hatudu rezultadu ba povu Timor-Leste,” nia hateten.
Ba preparasaun ne’e, MJDAK aloka orsamentu hamutuk $98.000. Detalhe ba konsentrasaun $28.000 no ba partisipasaun iha kompetisaun $70.000.
“Ba preparasaun konsentrasaun atleta sira osan ne’ebé ita tau $28.000, osan atu ba tuir kompetisaun ita tau $70.000,” nia dehan.
Iha fatin hanesan, Xefe Misaun Timor-Leste ba Asian Para Games, Aniceto Berlelo, hateten atleta Paralímpiku na’in-haat ne’e iha esperiénsia no fó ona medalla barak ba Timor-Leste.
“Ita-nia atleta Paralímpiku na’in-haat ne’e iha esperiénsia, sira ofrese ona medalla lubuk ida mai Timor-Leste, ita tau konfiansa ba sira no sira sei hatudu rezultadu di’ak,” nia dehan.
Nia agradese ba Governu liuliu MJDAK ne’ebé apoiu ona orsamentu hodi prepara atleta sira durante fulan-rua antes ba kompete.
“Ita agradese ba Governu liu-liu MJDAK ne’ebé apoiu ona orsamentu ba ita hodi prepara atleta sira antes fulan-rua hodi ba tuir kompetisaun,” nia afirma.
Atleta Paralímpiku Tenis, Abelita Borges, mós hato’o agradesimentu ba Governu ne’ebé fasilita fatin ba treinamentu.
“Agradese ba Governu bele fasilita ona ami hodi tau ami iha fatin ida hodi hala’o treinamentu, ha’u fiar katak sei hatudu rezultadu di’ak iha eventu internasionál ne’e,” Abelita dehan.
Nia promete sei joga ho di’ak maske kompete ho nasaun sira ne’ebé iha esperiénsia barak, ho objetivu atu lori medalla ba Timor-Leste.
“Maske kompete ho nasaun sira ne’ebé iha esperiénsia liu, maibé ami reprezenta Timor-Leste, ami sei joga ho di’ak atu ofrese netik medalla ruma mai Timor-Leste hodi hamorin ita-nia nasaun nia naran iha mundu,” nia dehan.
Jornalista : Hortêncio Sanchez
Editór : Cancio Ximenes
