Reseita EDTL husi Janeiru-Setembru hamutuk millaun $57
DILI, 08 Outubru 2026 (TATOLI) – Eletrisidade de Timor-Leste, Empreza Públika (EDTL) rekolla, entre Janeiru no Setembru 2026, reseita hamutuk $57 ba kofre Estadu.
Komisáriu Ezekutivu Servisu Korporativu ba Eletrisidade de Timor-Leste, Empreza Públika, Júlio de Jesus Gonçalves, hatete reseita ne’ebé EDTL kobre ne’e mai husi venda pulsa, pedidu nova ligasaun ahi, multa husi dada ahi ilegál, aluga postering no dokumentu ne’ebé fa’an iha konkursu osan tau iha banku.
“Projesaun ne’ebé Ministériu Finansa fó mai EDTL iha tinan ne’e tenke rekolla reseita hamutuk millaun $70. Ami nafatin halo esforsu ho atividade sira ne’ebé iha, garante katak to’o Dezembru ne’e bele rekolla to’o millaun $70”, Júlio de Jesus Gonçalves hatete ba Tatoli, ohin.
Nia dehan EDTL esforsu nafatin atu rekolla reseita to’o alvu ne’ebé iha, maibé ida-ne’e mós presiza kontribuisaun husi públiku mak labele dada ahi ilegá, nune’e kontribui mós ba reseita sira ne’e sa’e.
Dirijente ne’e esplika katak bainhira atu dada ahi ne’e selu de’it mak kontadór ne’ebé monta ne’e, no sosa pulsa $1 no $2 atu enxe, maibé dada ahi ilegál ida-ne’e sei denda bazeia ba klarifikasaun ilegál ne’ebé komete hahú uza iha sá fulan, selu kontadór ne’ebé halo aat ne’e, no selu multa osan minimu ho montante $1.200 no másimu ne’e liu ida-ne’e.
“Ami nafatin husu ba públiku katak ita-nia labele dada ahi ilegál, tanba imi hanoin katak ita-nia sentrál elétrika Hera no Betanu ne’e presiza osan mak sosa kombustivel, ne’ebé ita hotu tenke kontribui. Atu dada ahi karik husu kontaktu tékniku EDTL mak ba dada, nune’e labele fó risku ba imi”, nia konkui.
Notisía relevante: Komisaun C husu EDTL aumenta kolesaun reseita
Jornalista: Arminda Fonseca
Editora: Maria Auxiliadora
