MOP sei halo estudu detalladu ba konstrusaun Ponte Laklo iha Alas
MANUFAHI, 11 Outubru 2026 (TATOLI)–Ministériu Obra Públika (MOP) sei halo estudu tékniku detalladu ba konstrusaun Ponte Laklo, Postu Administrativu Alas, Munisípiu Manufahi, atu fasilita asesu komunidade ba servisu saúde no movimentu ema no produtu agríkola, liuliu durante tempu udan.
Ministru Obra Públika, Samuel Marçal, durante observa projetu konstrusaun estrada iha Postu Administrativu Alas, Sábadu (10/10), dehan katak ekipa téknika sei filafali bá fatin ne’e atu halibur dadus no halo avaliasaun téknika kona-ba kondisaun Mota Laklo, nu’udár etapa inisiál molok determina solusaun konstrusaun ponte nian.
“Ohin ha’u informa ona ba tékniku sira atu mai haree filafali no halo estudu detalladu, nune’e ita bele konstrui ponte refere,” Samuel Marçal dehan.
Nia esplika katak ponte ne’e importante atu hadi’a ligasaun entre komunidade, inklui rota Dotik–Alas, Alas–Tutuluru no Tutuluru–Turiskai. Infraestrutura ne’e mós sei fasilita transporte produtu agríkola husi komunidade bá merkadu.
Iha parte seluk, Administradór Postu Administrativu Alas, Aquelino da Costa Fernandes, husu ba MOP atu tau-atensaun ba kondisaun Mota Laklo, tanba korrente mota nian sai maka’as durante tempu udan no impede movimentu komunidade, liuliu iha área We Kakau Oan.
“Iha-ne’e dalan alternativu laiha. Tanba ne’e, ami husu ba Ministru Obra Públika, Samuel Marçal, atu mai haree diretamente situasaun iha fatin ne’e, tanba bainhira udan, korrente mota nian maka’as tebes,” Aquelino haktuir.
Tuir administradór ne’e, korrente mota nian ne’ebé maka’as mós afeta asesu komunidade ba servisu saúde, tanba pesoál saúde sira hasoru difikuldade atu transporta pasiente ba tratamentu durante tempu udan.
Nia esplika katak dalabarak ambulánsia hein iha mota ibun, enkuantu komunidade tenke ajuda lori pasiente husi mota sorin ida bá sorin seluk atu asesu ba ambulánsia. Pasiente sira-ne’e inklui inan isin-rua ne’ebé presiza asisténsia partu no ema moras sira husi Aldeia Aituha, Manus, Lurin no Ailora.
Aquelino mós husu ba MOP atu harii estrutura protesaun iha Mota Laklo hodi hamenus risku ba komunidade, liuliu iha área Kakau Oan, bainhira korrente mota nian aumenta durante tempu udan.
Postu Administrativu Alas iha suku neen no aldeia 21, ho populasaun besik ema 12.000.
Kontekstu
Iha tinan 2023, TATOLI relata katak autoridade Munisípiu Manufahi husu ba Governu sentrál, liuliu MOP, atu interven iha Mota Laklo tanba mota ne’e estraga uma no toos komunidade nian. Asuntu ne’e hatudu katak kondisaun Mota Laklo no risku durante tempu udan sai ona preokupasaun ba autoridade lokál.
Lee notísia relevante: https://tatoli.tl/2023/05/09/autoriedade-manufahi-husu-governu-sentral-normaliza-mota-laklo/
Iha Fevereiru 2025, TATOLI mós relata katak Konsellu Ministru aprova ona projetu MOP ualu, inklui instalasaun kaixa gabiaun iha Mota Laklo, Suku Berloik, Postu Administrativu Alas, ho orsamentu $396.249,46. Projetu ne’e iha relasaun ho esforsu atu hamenus impaktu erozaun no hadi’a protesaun iha área mota nian.
Lee mós notísia anteriór: https://tatoli.tl/2025/02/05/autoriza-ona-despeza-ba-projetu-ualu-husi-mop/
Jornalista: Francisco Sony
Editór: Xisto Freitas da Piedade
