IQTL simu ona ekipamentu ba Laboratóriu Ai-han no Bebida

DILI, 12 Outubru 2026 (TATOLI) – Institutu ba Kualidade Timor-Leste (IQTL, sigla portugés) simu ona ekipamentu ba Laboratóriu Ai-han no Bebida (Food and Beverages), ne’ebé sei uza atu halo análize kualidade seguransa produtu alimentár hodi apoia setór privadu atu asesu ba merkadu nasionál no internasionál.

Vogall III husi Departamentu Kualifikasaun no Asuntu Internasionál iha IQTL, Tolentino Mariano Fraga Guterres, hatete katak prosesu akizasaun ekipamentu ne’e hala’o durante fulan tolu, hahú husi Juñu to’o Setembru 2026. Ekipamentu sira ne’e sosa iha Xina no to’o iha Timor-Leste iha inísiu Outubru.

“Laboratóriu ne’e atu apoiu setór privadu sira atu análize sira-nia produtu no hetan Certificate of Analysis (CoA), hodi garante kualidade no seguransa produtu nian, nune’e bele tama ba merkadu nasionál no internasionál. Ekipamentu ne’e ita sosa ho orsamentu rihun $90”, Tolentino Mariano Fraga Guterres, hatete ba Tatoli ohin.

Nia esplika katak ekipamentu laboratóriu ne’e kompostu husi item 16, ne’ebé inklui ekipamentu ba teste kímia, fízika, no mikrobiolójiku.

Ekipamentu sira ne’e mak hanesan balansa analítika, pH meter dijitál, refraktómetru dijitál, oven hamaran, hot plate ho magnetic stirrer, water bath, centrifug benchtop, no reajente análize fízika no kímika.

Aleinde ne’e, ekipamentu seluk mak biosafety cabinet class II, autoclave, incubator mikroba, mikroskópiu binocular, kulkas laboratóriu, freezer laboratóriu, micropipette set, no ekipamentu protesaun pesoál (APD) no dezinfetante laboratóriu.

Tolentino hatete katak ekipamentu sira ne’e importante atu prepara laboratóriu ne’e, maski konstrusaun edifísiu nian sei la’o hela.

Tuir nia, konstrusaun laboratóriu ne’e daudaun atinje ona progresu entre 15% ba 20. Fundasaun no ai-riin sira harii ona, no agora prepara atu kontinua ho konstrusaun sinta leten.

Edifísiu ne’e sei andar rua, ho espasu ba laboratóriu fízika, kímika no biolojia, no arte seluk atu uza ba Departamentu Kualifikasaun no Asuntu Internasionál.

“Edifísiu ne’e nia konstrusaun la’o daudaun ona, ekipamentu mós sosa ona. Ida-ne’e vantajen boot tanba sei ajuda ita-nia setór privadu sira atu halo importasaun no esportasaun”, nia hatete.

Notísia relevante: IQTL lansa fatuk dahuluk ba konstrusaun Laboratóriu Ai-han no Bebida 

Jornalista: Arminda Fonseca

Editora: Maria Auxiliadora