MKI koordena ho loja sira atu implementa pagamentu dijitál
DILI, 13 Outubru 2026 (TATOLI) – Ministériu Komérsiu no Indústria (MKI) kontinua koordena ho loja no supermerkadu sira iha Timor-Leste atu implementa sistema pagamentu dijitál, hanesan Timor Unique QR (TUQR) no sistema pagamentu instantáneu Ti-FAS, ne’ebé Banku Sentrál Timor-Leste (BCTL, sigla portugés) lansa ona.
Ministru Komérsiu no Indústria, Filipus Nino Pereira, hatete katak koordensaun ne’e importante atu promove utilizasaun pagamentu dijitál iha atividade komersiál, liuliu agira Timor-Leste sai ona membru ASEAN no Organizasaun Mundiál Komérsiu (OMK).
Nia esplika katak MKI hato’o ona sirkulár no informasaun ba loja sira atu implementa sistema pagamentu dijitál, no kontinua serbisu hamutuk ho BCTL atu sensibiliza ajente ekonómiku sira kona-ba benefísiu sistema ne’e.
“Sirkulár mós ami hato’o ona ba sira, ami nafatin halo koordenasaun ho BCTL atu kontinua sosializa no tenke implementa duni. Tanba sei fasilita ita-nia atividade ekonómika iha ita-nia rai”, nia dehan.
Tuir nia, implementasaun sistema pagamentu dijitál la’ós de’it atu fasilita atividade komersiál iha rai-laran, maibé mós atu prepara negósiu Timor-Leste sira atu liga ho merkadu rejionál, liuliu iha kontestu transformasaun dijitál ASEAN nian.
Nia subliña katak sistema ekonomia dijitál ne’ebé seguru no kredivel bele aumenta konfiansa investidór sira atu investe iha Timor-Leste, tanba tranzasaun bele hala’o ho seguru no negósiu sira bele asesu ba merkadu rejionál.
“Iha prátika pagamentu online, iha nasaun membru ASEAN 10 ne’e lao tiha ona, Timor-Leste mak foin tama iha faze ida-ne’e. Importante tebes implementa pagamentu online tanba ita iha ona enkuadramentu legál ba komérsiu eletróniku no asinatura eletrónika, atu garante legalidade prosesu tranzasaun ne’ebé la’o iha ita-nia nasaun no nasaun sira seluk”, Filipus Nino Pereira hatete.
Nia hatutan katak loja sira tenke fó opsaun ba konsumidór atu selu sasán ho osan fíziku ka liuhusi pagamentu online, hodi fasilita tranzasaun no aumenta konfiansa iha sistema pagamentu dijitál.
Tuir observasaun jornalista Tatoli iha terrenu, supermerkadu boot sira hanesan Centro, Meymart, Timor Plaza, W Four, inklui loja kosmétika balun, uza ona pagamentu dijitál ka online hanesan TUQR, Union Pay, T-Pay. Maibé, loja ki’ik no loja xineza sira maioria seidauk implementa sistema ne’e.
Funsionáriu loja xineza balun hatete katak sira seidauk implementa pagamentu dijitál tanba konsumidór sira maioria nafatin uza osan fíziku bainhira sosa sasán.
Notísia relevante: PM Xanana lansa TI-FAST no TuQR hodi moderniza sistema pagamentu dijitál
Jornalista: Arminda Fonseca
Editora: Maria Auxiliadora
