Pratika fraternidade umana tenke hatudu liuhusi asaun konkreta
DILI, 13 Outubru 2026 (TATOLI) – Pastor Agustino dos Santos, husi Igreja Protestante Fatuhada, apela ba komunidade atu hametin fraternidade umana liuhusi asaun konkreta iha moris loroloron, la haree diferensa relijiaun, atu harii dame no solidariedade iha sosiedade.
Pastor Agustino hateten katak fraternidade umana la’ós de’it liafuan furak atu ko’alia, maibé tenke hatudu liuhusi hahalok no asaun konkreta, liuliu iha relasaun ho ema seluk ne’ebé iha diferensa fiar.
“Ita bele dehan ita ema sarani, maibé se ita la hadomi ita-nia viziñu ne’ebé la hanesan fiar ho ita, ita-nia fiar mamuk,” Pastor Agustino dos Santos, hateten ba TATOLI iha Igreja Pentekosta, Fatuhada Dili, tersa ne’e.
Nia esplika katak iha hanorin fiar Protestante, fraternidade umana iha baze prinsipál tolu, mak ema hotu kria husi Maromak, Jesus Kristu nia sakrifísiu ba mundu tomak no domin nu’udar valór importante iha moris ema nian.
Prinsípiu dahuluk, bazeia ba Livru Génesis 1:27, hatudu katak ema hotu iha dignidade hanesan tanba Maromak kria ema tuir Nia imajen.
“Ema hotu iha dignidade hanesan, tanba Maromak kria ita hotu ho Nia imajen. La iha ema aas liu, la iha ema kraik liu,” nia haklaken.
Prinsípiu daruak, tuir Evanjellu João 3:16, hatudu domin Maromak nian ba mundu tomak, ne’ebé, tuir nia, tenke sai baze ba ema atu simu no respeita malu, la taka odamatan ba ema ne’ebé iha diferensa relijiaun.
“Jesus la mate de’it ba Protestante. Nia mate ba mundu tomak. Entaun ita labele taka odamatan ba ema seluk,” nia dehan.
Enkuantu, prinsípiu datoluk mak domin, ne’ebé temi iha 1 Koríntios 13:13. Pastor Agustino subliña katak importante liu la’ós de’it hatene Bíblia, maibé moris tuir hanorin domin iha relasaun ho ema seluk.
“Fraternidade umana katak pratika domin. La’ós hatene Bíblia barak, maibé oinsá ita moris tuir domin ne’e,” nia hateten.
Programa fraternidade iha Fatuhada
Atu konkretiza prinsípiu fraternidade umana, Pastor Agustino informa katak Igreja Protestante Fatuhada hahú ona programa tolu ne’ebé foka ba edukasaun, limpeza ambientál no apoiu umanitáriu ba família vulneravel.
Programa dahuluk, “Uma Dame”, loke igreja nia odamatan iha loron tersa no kinta ba labarik sira husi relijiaun hotu atu estuda hamutuk.
Programa daruak, “Misaun Hamoos”, hala’o hamutuk ho juventude Katólika atu hamoos tasi-ibun Fatuhada, fulan ida dala ida.
Enkuantu programa datoluk, “Fila Liman”, fahe foos ho kuantidade kilogramas 10 ba família 15 ne’ebé presiza apoiu, la haree ba família sira-nia relijiaun.
Rona no aplika Maromak nia liafuan
Tuir Pastor Agustino, programa hirak-ne’e sai dalan ida atu hatudu katak domin, servisu hamutuk no solidariedade bele hametin unidade entre komunidade sira, maski iha diferensa fiar.
“Fraternidade umana hahú husi dalan oin, husi Aldeia Zero. Se ita iha Fatuhada bele moris dame malu, Timor tomak bele moris dame,” nia afirma.
Iha nia mensajen ikus, Pastor Agustino husu ba fiél no komunidade atu la’ós de’it rona Liafuan Maromak nian, maibé aplika iha moris loroloron, atu ema hotu bele sai maun-alin ba malu.
“Maromak tulun ami atu la’ós de’it rona Liafuan, maibé moris tuir Liafuan – sai maun-alin ba ema hotu,” nia konklui.
Jornalista: Camilio de Sousa
Editór: Rafael Ximenes de A. Belo
