Edukasaun Likisá prepara estudante finalista 2.931 ba Ezame Nasionál
LIKISÁ, 14 Outubru 2026 (TATOLI)—Servisu Edukasaun Munisipál Likisá prepara estudante finalista na’in-2.931 husi nivel Ensinu Báziku, Ensinu Sekundáriu Jerál no Ensinu Sekundáriu Tékniku-Vokasionál (ESTV) atu partisipa iha Ezame Nasionál 2026.
Diretór Nasionál Servisu Edukasaun Munisipál Likisá, Júlio da Silva, hateten katak preparasaun ba ezame ne’e la’o ona, no autoridade edukasaun hein simu pakote materiál ezame nian atu hala’o atividade ne’e tuir kalendáriu ne’ebé determina.
“Kandidatu sira-ne’ebé sei partisipa iha Ezame Nasionál hamutuk na’in-2.931. Ami prepara ona no hein simu pakote materiál ezame nian atu realiza Ezame Nasionál iha 19 Outubru,” Júlio da Silva hateten ba TATOLI liuhusi WhatsApp, Tersa ne’e.
Husi totál estudante finalista na’in-2.931, estudante na’in-1.565 maihusi Ensinu Báziku, kompostu husi estudante feto na’in-844 no mane na’in-721.
Enkuantu, estudante na’in-1.193 maihusi Ensinu Sekundáriu Jerál, kompostu husi estudante feto na’in-675 no mane na’in-518. Estudante na’in-173 seluk maihusi Ensinu Sekundáriu Tékniku-Vokasionál, kompostu husi estudante feto na’in-81 no mane na’in-92.
Júlio esplika katak eskola sira iha munisípiu ne’e prepara ona sala ezame, sistema vijilánsia, númeru ezame no oráriu, hodi garante katak prosesu ezame bele hala’o ho orden no tuir prosedimentu.
Ba sentru ezame, Ensinu Báziku sei utiliza sentru hamutuk 14, Ensinu Sekundáriu Jerál iha sentru ualu, no Ensinu Sekundáriu Tékniku-Vokasionál iha sentru rua.
Preparasaun Ezame Nasionál 2026
Antes ne’e, Ministériu Edukasaun informa katak pontu Ezame Nasionál ba estudante finalista Klase 9 Ensinu Báziku no Klase 12 Ensinu Sekundáriu Jerál no Tékniku-Vokasionál prepara no imprime hotu ona, no tama ona iha faze einpakotamentu molok distribui ba sentru ezame sira.
Koordenadór Gabinete Unidade Kurríkulu Nasionál iha Ministériu Edukasaun, João Maupelu, hateten katak pontu ezame sira sei organiza tuir disiplina no eskola, antes haruka ba munisípiu no sentru ezame sira.
Lee informasaun relevante iha: https://tatoli.tl/2026/10/05/imprime-ona-pontu-ezame-nasional-agora-tama-faze-einpakotamentu/
Aleinde ne’e, Ministra Edukasaun, Dulce de Jesus Soares, apela ba estudante sira atu kontinua halo revizaun ba matéria no ba inan-aman no profesór sira atu fó apoiu durante preparasaun ba ezame.
Jornalista: Osória Marques
Editór: Xisto Freitas da Piedade
