Empreza sei entrega Otél Lifau iha Dezembru ho proposta millaun $10
OEKUSI, 14 Outubru 2026 (TATOLI) – Konstrusaun Otél Lifau, ne’ebé konstrui husi empreza internasionál Haichuan Construction Ltd, iha portaun boot Monumentu Lifau, sei entrega iha fulan-Dezembru 2026 ne’e, no husu rekumpenasaun ba Governu Timor-Leste liuhusi Autoridade Rejiaun Administrativa Espesiál Oekusi Ambeno (RAEOA), ho proposta preliminár millaun $10.
Prezidente Autoridade RAEOA, Régio da Cruz Salu, konsidera, otél Lifau nu’udar fasilidade ba turizmu no investimentu konvesnionál maka otél no ospitalidade.
Nia hateten, polítika ne’e inísia iha mandatu autoridade sesante konsege selebra akordu ofisiál ida hodi konstrui estabelesimentu otelár referidu, besik iha monumentu Lifau no tuir planu, sei finaliza konstrusaun ne’e iha Dezembru 2026 ne’e, maibé ho opsaun atu konsidera.
“Ita nia parseiru ne’e informa mai ona autoridade, katak konstrusaun ba otél ne’e sei remata iha Dezembru tinan ne’e, no sei entrega. Maibé, termu entrega ne’e, husu ita atu foti no utiliza ho opsaun haat,” nia hateten ba jornalista sira iha Oekusi, ohin.
Notísia relevante:FOTO ATUÁL: Empreza Haichuan ´harahun´ semitériu antigu 13 iha portaun bo’ot Lifau
Autoridade RAEOA ne’e, esplika husi opsaun haat ne’e maka bele halo akizisaun 100%, signifika Governu tenki selu fali kompañia nia osan.
“Proposta ne’e ha’u simu ona, ho razaun husi millaun $10 ne’e, tanba gasta ona ba konstrusaun ne’e, entaun sira-nia proposta preliminár mai ita husu millaun $10,” nia afirma.
Notísia relevante:Konstrusaun otél besik monumentu Lifau, Dom Virgílio: “Ita preokupa uitoan”
Nia informa, selebrasaun kontratu hodi harii konstrusaun ne’e, dezde 2024, nu’udar investimentu privada, maibé tanba públiku kestiona kontrusaun referida, ne’ebé konstrui okupa fatin Monumentu Lifau, nune’e empreza mós konsiente ona, tuir lei labele hala’o nia atividade investimentu iha fatin ne’e.
“Ha’u resposta kedas sira-nia proposta preliminár ne’e, katak ami sei enkamiña ba kontabilidade atu analiza proposta ne’e, no iha mós opsaun tolu seluk, hodi fó dalan di’ak ba Governu atu opta, entaun ami sei estuda lai, depois submete ba Governu Sentrál kona-ba opsaun no pozisaun ne’ebé ita bele toma, husi parte empreza konkorda katak, sei la kontinua hodi utiliza otél ne’e, nia operasionál,” nia hateten.
Notísia relevante:Prezidente RAEOA klarifika kona-ba konstrusaun otél besik Monumentu Lifau
Legalidade no investimentu iha futuru
Régio da Cruz, informa, investimentu otél Lifau ne’e, iha relasaun ho atividade jogu online ilegál, scame call centre husi otél Oé-Upun nian, maibé asuntu ne’e, la’ós kompeténsia RAEOA nian, tanba tuir lei númeru 3/2014 hateten, kompeténsia RAEOA iha área haat la’ós RAEOA nian.
Kompeténsia eskluziva Governu Sentrál no la’ós RAEOA nian iha haat mak hanesan:
- Defeza Nasionál no Seguransa Interna.
- Polítika Estranjeira / Negósiu Estranjeiru.
- Investigasaun Kriminál no Justisa (hanesan kombate jogu ilegál, cybercrime, scam call centers).
- Hanesan Prezidente RAEOA mensiona, kazu kriminál sira ne’e mantein nu’udar kompeténsia puramente Governu Sentrál no Polísia Nasionál (PNTL/PCIC) nian.
Kontestu no antesedente
Antes ne’e, Amo Vigario Foran ho Vigararia Oekusi, Atuál Padre Paroko Nossa Senhora do Rosário Numbei, Carlos de Deus, rekomenda ba Autoridade RAEOA ho Koordenadór ZEEDOA, hodi muda konstrusaun otél ne’ebé empreza estranjeira ida konstrui besik iha monumentu Lifau tanba futuru sei estraga imajen fatin sagradu ne’e
Notísia relevante:Pe. Carlos husu Autoridade RAEOA muda otél ne’ebé harii besik monumentu Lifau
Entretantu, lembra katak, antes ne’e, Prezidente Autoridade RAEOA, Rogério Tiago Lobato, informa, projetu otél Lifau hahú konstrusaun konstrui otél ne’e ho kuartu 50, ne’ebé konstrui husi empreza Haichuan Construction Ltd, nu’udar investór internasionál ida husi nasaun Malázia, no selebra ona kontratu arrendamentu ho Autoridade RAEOA kada fulan empreza kontribui $5.000 ba kofre Estadu ho durasaun kontratu durante tinan-30.
Jornalista: Abílio Elo Nini
Editór: Rafael Ximenes de A. Belo
