Arkidioseze Dili kontinua hein informasaun ofisiál husi GASC

DILI, 15 Outubru 2026 (TATOLI) – Arkidioseze Dili seidauk simu informasaun ofisiál husi Governu liuhusi Gabinete Apoiu Sosiedade Sívil (GASC) kona-ba prosesu kontinua konstrusaun Igreja Aimutin, ne’ebé para ona durante tinan barak. Vigáriu-Jerál Arkidioseze Dili, Pe. Graciano dos Santos Barros, afirma katak prosesu tomak kona-ba kontinuidade obra igreja ne’e iha responsabilidade GASC.

“Kona-ba atu kontinua konstrusaun Igreja Aimutin, parte Arkidioseze Dili seidauk simu informasaun ofisiál ruma husi Governu liuhusi GASC. Tanba prosesu tomak kona-ba konstrusaun igreja referida ne’e, GASC mak hatene liu,” Pe. Graciano dos Santos Barros hateten ba TATOLI iha nia serbisu-fatin, Lecidere, Dili.

Na’i-Lulik ne’e esplika katak, maski iha informasaun ne’ebé publika iha mídia kona-ba planu GASC atu fó apoiu finanseiru hodi finaliza konstrusaun Igreja Aimutin, to’o agora Arkidioseze Dili seidauk iha enkontru ofisiál ka simu informasaun klaru kona-ba planu no kalendáriu ba kontinuidade obra ne’e.

Tuir Pe. Graciano, falta komunikasaun no koordenasaun entre entidade relevante sira halo Arkidioseze Dili seidauk hatene ho klaru bainhira mak konstrusaun igreja ne’e sei hahú fali, maski obra ne’e para kle’ur ona.

Prontu koopera 

Nia mós lembra katak, iha tinan kotuk, Ajénsia Dezenvolvimentu Nasionál (ADN), hamutuk ho GASC, halo verifikasaun ba obra Igreja Aimutin atu haree posibilidade kontinua konstrusaun. Maibé, to’o agora, Arkidioseze Dili seidauk simu informasaun ofisiál husi Governu kona-ba rezultadu verifikasaun ne’e no medida sira ne’ebé sei foti atu kontinua obra.

“Ita hein de’it bainhira mak kontinua konstrusaun Igreja Aimutin ne’e sei hahú fali. Ami prontu atu koopera hodi finaliza obra ne’e, tanba konstrusaun ne’e para ona durante tinan barak,” Vigáriu-Jerál Arkidioseze Dili ne’e dehan.

Notísia relevante:Governu sei prevee millaun $1 atu finaliza konstrusaun Igreja Aimutin

Nia enfatiza katak Arkidioseze Dili prontu atu kolabora ho instituisaun governamentál no entidade sira ne’ebé envolve iha prosesu ne’e, atu nune’e konstrusaun igreja bele kontinua no ramata tuir planu ne’ebé sei konkorda hamutuk.

Antes ne’e, Koordenadór GASC, Joaquim Freitas da Costa, deklara ona katak GASC aloka ona fundu hamutuk millaun $ 1 atu finaliza konstrusaun Igreja Aimutin. Maski nune’e, to’o agora seidauk iha koordenasaun ofisiál ho Arkidioseze Dili kona-ba implementasaun planu ne’e.

Situasaun ne’e hatudu katak, maski iha deklarasaun kona-ba alokasaun fundu atu finaliza igreja, prosesu kontinuidade obra sei presiza komunikasaun no koordenasaun entre parte sira ne’ebé envolve, atu bele klarifika etapa tuirmai no define bainhira mak konstrusaun sei hahú fali.

Igreja Aimutin sai nu’udar obra konstrusaun ne’ebé hein hela atu finaliza, no Arkidioseze Dili kontinua hein informasaun ofisiál husi Governu no GASC kona-ba prosesu kontinuidade konstrusaun ne’e.

 Notísia relevante:Konstrusaun igreja Aimutin iha prosesu fiskalizasaun

Jornalista: Camilio de Sousa

Editór: Rafael Ximenes de A. Belo