Autoridade RAEOA koordena ona MPIE moderniza Jardín Oébau ho fundu KAFI

OEKUSI, 15 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, koordena ona Ministériu Planeamentu no Investimentu Estratéjiku (MPIE) hodi halo reabilitasaun ba Monumentu Jardín Oébau to’o Largo Nossa Senhora perténsia tasi-ibun inklui Monumentu Istóriku (Monumen Bersejarah) liuhusi verba Konsellu Administrasaun Fundu Infraestrutura (KAFI).

Prezidente Autoridade RAEOA, Régio da Cruz Salu hateten, prosesu reabilitasaun ne’e nu’udar preparasaun ba realizasaun Kongresu Internasionál Komunidade Ko’alia Lian Portugés (CPLP, sigla portugés) iha 2027 nian kona-ba Edukasaun meiu-Ambiente.

“Jardín Oébau to’o Largo Nossa Senhora Santa Maria, ne’e MPIE mak finansia liuhusi fundu KAFI, no iha prosesu atu finaliza kontratu ba kompañia nasionál ida, atu halo reabilitasaun iha tasi-ibun ne’e, hahú husi Jardím monumentu Koreanu,” nia hateten ba jornalista sira iha Oekusi, kuarta ne’e.

Notísia relevante:MESSK husu Autoridade RAEOA moderniza Jardín Koreanu Oébau sai fatin turístika

Autoridade ne’e informa katak antes ne’e, Autoridade RAEOA simu ona proposta husi parsériu estranjeiru rua –husi nasaun Korea Súl no Austrália, ho vontade atu apoia mós halo reabilitasaun Jardín ne’e.

Tanba, nia dehan, orsamentu 2027 ba RAEOA laiha alokasaun ba asuntu ne’e, maibé sei kontribui planu mestre (master-plant) ba nia modelu, nune’e parseiriu sira bele halo tuir.

“Ha’u kompleta ona dadus fíziku balun, tanba Jardín ne’e iha monumentu husi Koreanu no Austrália nian, parte rua ne’e komprometidu atu ajuda RAEOA hodi hadi’a jardín ne’e atu sai hanesan fatin atrasaun públiku ba futuru, ne’ebé ita sei hetan apoia rua – ida husi MPIE no parseiriu estranjeiru husi nasaun rua ne’e, atu moderniza jardín ne’e sai parke di’ak,” nia afirma.

Notísia relevante:Autoridade RAEOA orienta IGEADI, I.P sobu ona kafetária “O Manhoso” iha jardín Oébau

Nia hateten, desizaun ne’e nu’udar preparasaun ba 2027 nian, tanba iha tinan oin RAEOA sai uma-na’in ba realizasaun Kongresu Internasionál CPLP kona-ba edukasaun ambiente iha Oekusi, nune’e Jardín sira presiza moderniza.

Monumentu istóriku

Aleide ne’e mós, sei halo reabilitasaun ba Monumen Bersejarah lokaliza iha kedas kampu futeból nia sorin, atu sai sentru promosaun talentu ba labrik sira, sei hahú ho autdoor (fatin nakloke) ba públiku, atu sai ba fatin ba labarik hothotu iha Oekusi, bele asesu hodi aprende, pintura, múzika, violiñu, lee no seluktan.

“Ne’e hanesan insiativa ida espontaneo husi Autoridade RAEOA, liliu setór edukasaun atu eduka labarik sira labele gasta tempu ba atividade ne’ebé laiha valór ba futuru,”  nia afirma.

Notísia relevante:Reuniaun KAFI iha Oekusi, projetu 30 aprovadu inklui monumentu Lifau

Jornalista: Abílio Elo Nini

Editór: Rafael Ximenes de A. Belo