OEKUSI, 09 Marsu 2026 (TATOLI) – Ministru Ensinu Superiór Siénsia no Kultura (MESSK), José Honório da Costa Pereira Jerónimo, rekomenda ba Autoridade Rejiaun Administrativa Espesiál Oekusi Ambeno (RAEOA), atu moderniza monumentu Jardín Koreanu na’in-lima ne’ebé mate iha Oekusi atu sai fatin turístika ida iha Oekusi.
Notísia relevante:Hanoin hikas 06 Marsu 2003, militár Koreanu na’in-lima mate iha mota Noel-Ekat
Ministru José Honório da Costa Pereira Jerónimo, hato’o nia rekomendasaun hafoin partisipa iha selebrasaun loron akontesimentu militár Koreanu na’in-lima ne’ebé mate iha mota Noel-Ekat iha loron 06 Marsu 2003, bainhira hala’o misaun pás Organizasaun Nasaun Unida (ONU) nian iha Timor-Leste.
“Ha’u hanoin Prezidente Autoridade, fatin ida-ne’e di’ak. Ha’u hanoin ideia ne’ebé Prezidente Autoridade ohin dehan, di’ak tebtebes, atu bele halo luan uitoan fatin ne’e, atu ita kontinua tinan-tinan fó omenajen ba ita-nia kolega, amigu, parseiriu na’in-lima ne’ebé mate iha ita-nia rai, sira la’ós tuur-tuur mai mate de’it la’e, sira mai halo serbisu pás nian, apoia ita-nia komunidade, ajuda ita-nia país sei ohin ita-bele la’o oras 24 ita sura mós ho Koreanu sira-nia apoia,” nia hateten.
Notísia relevante:Autoridade RAEOA orienta IGEADI, I.P sobu ona kafetária “O Manhoso” iha jardín Oébau
Prezidente Autoridade RAEOA, Régio da Cruz Salu, kompromete sei koordena ho Governu Korea do Súl, tanba antes ne’e, Autoridade hadi’a ona hodi prepara ba futuru presiza moderniza sentru omenajen.
“Tinan kotuk ami hamoos ona fatin ne’e, nune’e iha tinan ne’e, setór privadu ne’ebé hetan konfiansa bele halo Jardín ne’e to’o Jardín Santa Maria, halo fatin ne’e, sai fatin públiku no fatin turístiku, livre husi impedimentu nune’e ita hamosu fatin ne’e sai hanesan sentru atensaun, hodi reprezenta kooperasaun no reprezenta mós omenajén ba sakrifísiu povu, sakrifísiu ema hotu atu halo rai ne’e ukun rasik-aan,” nia hateten iha Oekusi.
Nia informa katak iha tinan-2027, inisiativa ne’e tenkiser RAEOA ho Embaxada Korea do Súl ba Timor-Leste.
“RAEOA komprometidu katak iha 2027, se ha’u fizikálmente laiha iha ne’e karik, labele haluha ha’u-nia maluk sira-ne’ebé kontinua karik, favór ida ajenda ne’e labele muda,” nia promete.
Notísia relevante:SEATOU fó prazu ba kafetária iha Jardin Koreanu Oébau hamamuk fatin
Entretantu, militár Koreanu na’in-lima ne’ebé lakon sira-nia vida iha loron 06 Marsu 2023 iha mota Noél-Ekat mak hanesan, Letnan Colonel Byungjo Min, Letnan Colonel Jin Kyu Park, Sarjentu Jong Hoon Baek, Sarjentu Jeong Joong Kim no Sarjentu Hee Choi.
Notísia relevante:Konsuladu Korea Súl-Autoridade RAEOA presta omenajén ba monumentu militár koreanu na’in-lima
Jornalista: Abílio Elo Nini
Editór: Rafael Ximenes de A. Belo
