OEKUSI, 09 Marsu 2026 (TATOLI) – Governu Korea do Sul liuhusi nia embaixada iha Timor-Leste (TL) hamutuk ho Autoridade Timoroan sira memoriza akontesimentu militár Koreanu na’in-lima ne’ebé mate iha mota Noel-Ekat iha loron 06 Marsu 2003 liubá, bainhira hala’o misaun pás Organizasaun Nasaun Unida (ONU) nian iha Timor-Leste.
Iha ámbitu ne’e, Embaxadór Korea do Súl ba Timor-Leste, Chang Hayeon, hamutuk ho Ministru Ensinu Superiór Siénsia no Kultura (MESSK), José Honório da Costa Pereira Jerónimo, no Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, sunu lilin no kari ai-funan iha monumentu Jardim Koreanu Oébau iha sub-rejiaun Pante Makasar Rejiaun Administrativa Espesiál Oekusi Ambeno (RAEOA), hodi hanoin hikas saudozu koreanu sira ne’e.
Notísia relevante:Konsuladu Korea Súl-Autoridade RAEOA presta omenajén ba monumentu militár koreanu na’in-lima
Ministru Ensinu Superiór Siénsia no Kultura (MESSK), José Honório da Costa Pereira Jerónimo, afirma, nu’udar timoroan rekoñese, tenke fó omenajén saudozu sira-nia sakrifísiu iha momentu tempu difísil liubá tanba sira-nia kontribuisaun ba ita-nia independénsia ne’e importante tebtebes.
“Ita hanesan timoroan, ita tenke agradese no orgullu. Ita fó omenajén ba sira, tanba sira parténsia Timor bainhira halo misaun iha ita-nia rain, tanba ita seidauk iha soldadu ba pás ba nasaun seluk, maibé karik aban bairua iha, talvés ba iha ema nia rai ita mós dalaruma hetan susar hanesan sira,” nia hateten.
Notísia relevante:Kim Jeongho husu Governu asegura monumentu Koreanu na’in-lima mate iha RAEOA
Iha biban ne’e, Embaxadór Korea ba Timor-Leste, Chang Hayeon, reprezenta Governu Korea do Súl hato’o sentimentu solidariedade ba sira-nia família tanba sira-nia misaun úniku tebes hodi proteze pás ba povu Timor-Leste.
“Ami-nia soldadu sira-ne’e, mai iha Timor-Leste ho objetivu úniku atu proteze pás iha rai ida-ne’e, liu-liu iha rejiaun Oekusi, sira-nia atividade manutensaun pás nian, konsege harii relasaun di’ak no konfiansa ne’ebé kle’an ba komunidade lokál, husi esforsu sira-ne’e mak to’o ohin loron kooperasaun entre Timor-Leste ho Korea do Súl sai metin liután,” diplomata ne’e konsidera.
Tanba ne’e, tuir embaixadór koreanu ne’e katak ita hotu hanoin nafatin sira katak, sira-nia sakrifisíu ne’ebé boot tebes, ne’e sei sai hanesan ponte ida-ne’ebé liga povu Korea no povu Timor-Leste. “Ohin ita hamutuk iha ne’e fó onra ba sira, no promete katak ita sei nunka haluha sira-nia sakrifísiu ba rai ida-ne’e, ha’u mós hakarak hato’o sentimentu solidariedade klean ba sira-nia família iha Korea do Súl”.
Prezidente Autoridade RAEOA, Régio da Cruz Salu, nu’udar Oekusi-oan, agradese ba Governu Korea do Súl no Timor-Leste tanba fó importánsia nafatin fó omenajén ba saudozu sira-nia sakrifísiu.
“Ami hakru’uk ba martír sira-ne’ebé bele fó aan sira-nia vida ba ita-nia rai hodi sai ukun aan. Importánsia kooperasaun ita ho ita-nia belun iha Koreanu ne’ebé fó importánsia nafatin, hodi fó omenajén ba forsa koreanu sira-ne’ebé faz parte terus no sakrifísiu, nune’e bele harii ita-nia rai no ita-nia Estadu,” nia hateten.
Notísia relevante:Koreanu na’in-lima mout iha Noel Ekat, ida seidauk hetan to’o ohin loron
Entretantu, militár Koreanu na’in-lima ne’ebé lakon sira-nia vida iha loron 06 Marsu 2023 iha mota Noél-Ekat mak hanesan, Letnan Colonel Byungjo Min, Letnan Colonel Jin Kyu Park, Sarjentu Jong Hoon Baek, Sarjentu Jeong Joong Kim no Sarjentu Hee Choi.
Notísia relevante:PR Horta atribui medalla méritu ba militár Korea na’in-lima mate iha RAEOA
Jornalista: Abílio Elo Nini
Editór: Rafael Ximenes de A. Belo
