DILI, HEADLINE, INTERNASIONÁL, POLÍTIKA

PR Horta atribui medalla méritu ba militár Korea na’in-lima mate iha RAEOA

PR Horta atribui medalla méritu ba militár Korea na’in-lima mate iha RAEOA

Prezidente Repúblika (PR), José Ramos Horta, segunda ne’e, atribui medalla méritu ba militár na’in-lima hosi Korea do Sul ne’ebé hola parte iha forsa manutensaun pás ONU nian hodi hala’o misaun iha Timor-Leste. Imajen Tatoli/António Daciparu.

DILI, 08 agostu 2022 (TATOLI)—Prezidente Repúblika (PR), José Ramos Horta, segunda ne’e, atribui medalla méritu ba militár na’in-lima hosi Korea do Sul ne’ebé hola parte iha forsa manutensaun pás ONU nian hodi hala’o misaun iha Timor-Leste, ne’ebé mate iha loron 06 fulan-marsu tinan 2003 iha Rejiaun Administrativa Espesiál Óe-Cusse Ambeno (RAEOA).

Notísia Relevante: Kronolojia no biografia Koreanu na’in-lima ne’ebé lakon vida iha Noél-Ekat

Prezidente Repúblika liu hosi dekretu númeru 61/2022, 02 agostu, kondekorasaun militár Koreanu na’in-lima hosi Repúblika Korea do Sul ne’ebé mate bainhira hala’o exersísiu funsaun iha Oé-Cusse Ambeno, ba medalla méritu ne’e kria númeru 15/2009, 18 marsu, ba rekuiñesimentu no agradese ba sivíl, militár nasionál no internasionál fó ona kontribuisaun siginifikativu ba pás no estabilidade nasionál.

Prezidente Repúblika (PR), José Ramos Horta.Imajen Tatoli/António Daciparu.

Medalla méritu simboliza mós gratidaun ba sidadaun nasionál no estranjeiru ne’ebé dezempeña papél ativu no krusiál iha dezenvolvimentu no demokrásia iha Repúblika Demokrátika Timor-Leste no medalla méritu rekuiñese sakrefísiu mane no feto no família koloka seguransa iha risku hodi servi povu Timor-Leste no militár Koreanu na’in-lima mandatu iha 16 outubru 1999 to’o outubru 2003 ne’ebé hola parte hanesan forsa manutensaun pás ONU nian hodi hala’o misaun iha Timor-Leste.

“Ohin ita halibur an iha ne’e besik tinan 20 liu tiha Prezidénsia Repúblika halo omenajen ba militár forsa da pás Koreanu nian ne’ebé lakon vida iha asidente mota boot tun, asidente ida-ne’e iha Oé-Cusse,” PR Horta hateten iha diskursu iha serimónia atribuisaun medalla refere iha edifísiu Palásiu Prezidensiál, Bairru Pite.

Notísia Rlevante: Koreanu na’in-lima mout iha Noel Ekat, ida seidauk hetan to’o ohin loron

Notísia Relevante: Korea dignifika Noél-Ekat RAEOA nu’udar monumentu memoria ba Timor-Leste

Repúblika Korea partisipa iha forsa da pás ONU nian ne’ebé mai iha ne’e tuir International Force for East Timor (INTERFET) depois forsa da pás ONU nian UNTAET hahú iha 1999 to’o finál sira sai iha 2003.

Iha períodu ne’ebé elementu balun forsa pás ONU nian lakon sira-nia vida, hanesan ida Nova Zelândia lakon nia vida iha Suai-Covalima, elementu JNR portugeza servisu elikópteiru mós lakon vida hetan asidente iha Alas-Manufahi no elementu seluk tan inklui bainhira dezaktiva bomba besik Kristu Rei-Dili no elementu JNR ida mate iha subaun asidente karreta bainhira nia fila mai hosi Laleia ba halo dezaktivasaun bomba atinje nian iha ne’eba.

“Iha ita-nia rai ne’e elementu internasionál balun militár, polísia no sivíl lakon sira-nia vida, Repúblika Korea ne’ebé partisipa makaas forsa da pás iha Timor-Leste ema na’in-lima ne’e,”  PR dehan

Xefe Estadu lori Estadu Repúblika Demokrátika Timor-Leste no povu tomak nia naran  hato’o sentidu kondolensia  ba militár na’in lima no família vítima sira no repúblika Korea do Sul.

“Ba família ne’ebé iha ne’e, ha’u hakruuk ba imi no lori nasaun tomak nia kondolénsia, hakuak imi hamutuk, ho imi tau neon ba vítima sira-ne’e asidente mortál iha Oé-Cusse,” Prezidente Repúblika hateten.

Nune’e, eventu ida hanesan ne’e iha Timor-Leste nia istória família lubun ida iha Timor-Leste lakon Timoroan rihun ba rihun iha luta ida-ne’e nia laran durante tinan 24, ne’e duni nu’udar Timoroan komprende hatene no sente sofrementu família militár sira-ne’e nian.

Iha fatin hanesan reprezentante família militár Koreanu, Jung Hyein, agradese  ba Prezidente Repúblika  hodi realiza serimónia ne’e.

“Mezmu ami vizita fatin ne’e ho laran susar maibé ami sente duni katak ami-nia família, ami-nia laen no ami-nia oan no ami-nia aman ninia mate sai duni hanesan baze fundasaun ba iha dezenvolvimentu Timor-Leste nian,” nia hateten

Nia hatutan, mezmu tempu haree monumentu memoriál ne’ebé harii iha Oé-Cusse, sira sente duni katak sira-nia prezensa nafatin hosi povu Timor-Leste hanoin sira ho nune’e bainhira sira fila ba Korea mós sira sei sente hakmatek no matebian sira deskansa iha lalehan mós sei kontente bainhira haree faktu sira-ne’e.

“Nune’e ikus liu ho laran tomak hakarak ba povu no Estadu Timor-Leste nafatin lembra ami-nia família no ami-nia oan, ami-nia laen ba sira-nia dedikasaun iha Timor-Leste no ami fila ba Korea mós ami nafatin ba Timor-Leste ninia prosperu no dezenvolvimentu,” nia dehan.

Embaixadór Korea ba Timor-Leste, Kim Jeongho, lori Estadu Korea nia naran agradese ba Xefe Estadu bele realiza eventu ne’e, hanesan ema hotu hatene militár Koreanu na’in-lima mate liu ona tinan 19 liubá.

“Ba ami tinan 19 lori mós memória di’ak no memória aat ba ita hotu mezmu tinan 19 Estadu Timor-Leste liuhosi Prezidente Repúblika la haluha nafatin hakarak hodi kondekora sira liuhosi medalla orden méritu ida-ne’e, ami  agradese tebes,” nia hateten.

Notísia Relevante: Família presta omenajen ba militár Koreanu na’in-lima ne’ebé lakon vida iha RAEOA

Nia dehan, família matebian sira to’o iha ne’e ba mós Oé-Cusse hodi presta omenajen, nune’e agradese parte autoridade Oé-Cusse no populasaun tomak ne’ebé simu ho di’ak tebes.

Embaixadaa Korea do Sul iha Timor-Leste tinan ne’e konvida família sira tanba Repúblika Korea ho Timor-Leste halo relasaun bilaterál ba tinan 20 iha tinan ne’e.

“Hosi parte embaixada konvida família sira-ne’e mós ami iha konsiderasaun boot tebes tanba ami tauk konvida sira mai lori fali sira ba tristeza iha tinan 19 liu ba akontese, maibé família sira depois to’o iha Timor-Leste sira kontente tebes tanba sira hanoin katak liu ona tinan 19 Timor haluha ona sira-nia família maibé afinál to’o iha ne’e kuaze ema hotu-hotu sei hanoin sira na’in-lima nia dedikasaun no domin,” nia dehan.

Tanba ne’e, embaixadór ne’e hanoin katak ba família hosi matebian na’in lima sente domin ne’ebé povu Timor-Leste fó sei halo sira fila-fali ba Korea ho hakmatek.

“Maibe triste ida mak sei iha hanesan na’in Prezidente Repúblika nia haree hosi  sarjentu  Jeongjhoong Kim nia inan tanba nia oan nia isin mate to’o agora seidauk hetan iha Oé-Cusse, tanba ne’e ida-ne’e sei sai hela tristeza boot ba nia inan agora daudaun,” nia hateten.

Nune’e diplomata Koreanu ne’e fiar família matebian sira ne’e sei fila ba Korea ne’ebé sei sai amigu eternu ba Timor-Leste no sira sei hanoin nafatin Timor-Leste hanesan mós Timor-Leste hanoin sira nia família ne’ebé mate iha rai ida ne’e.

Entertantu, partisipa  iha serimónia ne’e mak Primeiru Ministru (PM), Taur Matan Ruak, membru VIII Governu, Xefe Estadu Maiór Jenerál FALENTIL-Forsa Defeza Timor-Leste (F-FDTL), Tenente Jenerál Falur Rate Laek, Komandante Jerál PNTL Komisáriu Faustino da Costa, Prokuradór Jerál Repúblika (PJR) Alfonso Lopez, Deputadu membru Parlamentu Nasionál balun, família matebian Koreanu, korpu diplomátiku no konvidadu sira seluk.

Notísia Relevante: Governu sei atribui medalla méritu ba militár korea na’in-lima

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!