Durante fulan sia, SERVE,I.P Oekusi arrekada reseita rihun $10-resin
OEKUSI, 15 Outubru 2026 (TATOLI) – Hahú husi fulan-Janeiru to’o Setembru 2026 ne’e, Serbisu Rejistrasaun no Verifikasaun Emprezariál, Institutu Públiku (SERVE I.P) sukursál Rejiaun Administrativa Espesiál Oekusi Ambeno (RAEOA) rekolla reseita hamutuk rihun $10.470.00. ba kofre Estadu.
Koordenadór SERVE, I.P) sukursál Oekusi, Sergio Emanuel Colo, informa katak, verba ne’e arrekada liuhusi tratamentu dokumentu hanesan rejistu foun, renova no alterasaun ho tipu Enim, Unipesoál Lda, Lda no tipu S.a.
“Reseita ne’ebé ami rekolla, husi Janeiru to’o Setembru tinan ne’e, rihun $10,470.00, reseita ne’e tama liuhusi konta bankaria RAEOA nian, la’ós direita ba nasionál maibé nafatin iha RAEOA,” nia hateten iha Oekusi, kinta ne’e.
Nia esplika, husi montante ne’e, komposta husi trimestre dahuluk – Janeiru, Fevereiru to’o Marsu rekolla $3.746; trimestre daruak – husi Abríl, Maiu to’o Juñu rekolla $2.760 no trimestre datoluk –husi Jullu, Agostu to’o Setembru rekolla $3.964.
Notísia relevante:2025, SERVE I.P sukursál Oekusi kontribui reseita rihun $17-resin ba kofre Estadu
Maske kada tinan, SERVE,I.P Sukursál Oekusi, rekolla reseita ba kofre Estadu sufisiente maibé enfrenta difikuldade mós barak, hanesan fasilidade komputadór, edifisíu, surat-tahan no fasilidade seluktan inklui transporte rasik.
“Maibé nu’udar servidór Estadu, ami tenke esforsa buka meiu oinsá atu fó atendimentu dignu ba ita-nia kliente ka komunidade sira iha Oekusi, iha ne’e ami utiliza de’it komputadór tolu ho laptop ida, ne’ebé la sufisiénte presiza aumenta nune’e bele garante servisu di’ak liutan,” nia hateten.
Jornalista: Abílio Elo Nini
Editór: Rafael Ximenes de A. Belo
