OEKUSI, 16 Janeiru 2026 (TATOLI) – Hahú husi Janeiru to’o Dezembru 2025, Serbisu Rejistrasaun no Verifikasaun Emprezariál, Institutu Públiku (SERVE I.P) sukursál Rejiaun Administrativa Espesiál Oekusi Ambeno (RAEOA) rekolla reseita hamutuk rihun $17,051.15 ba kofre Estadu.
Koordenadór SERVE, I.P) sukursál Oekusi, Sergio Emanuel Colo, informa katak, verba ne’e arrekada liuhusi tratamentu dokumentu hanesan rejistu foun, renova no alterasaun ho tipu Enim, Unipesoál Lda, Lda no tipu S.a.
“Tinan kotuk ita rekolla reseita ba kofre Estadu hamutuk rihun $$17,051.15.osan ne’e ita hatama liuhosi konta bankária RAEOA nian,” nia hateten iha Oekusi, ohin.
Notísia relevante:DRTT Oé-Cusse hatama reseita ba kofre Estadu rihun $11-resin
Koordenadór ne’e relata, durante 2025 SERVE I.P empreza no kioske ne’ebé halo rejista foun hamutuk 311, komposta husi tipu Enim 190, Unipesoál Lda 112 no Lda hitu (7). Sira-ne’ebé halo renovasaun hamutuk 449, mai husi tipu Enim 156, Unipesoál Lda 272, Lda 17 no S.a haat (4).
Nune’e mós hirak-ne’ebé halo alterasaun ka aumenta atividade hamutuk 241, mai husi tipu Enim 47, Unipesoál Lda 180, Lda rua (2) no S.a tolu (3).
“Empreza hirak-ne’e, maioria timoroan, balu estranjeiru hanesan tipu Enim no S.a, tanba timoroan maioria Lda,” nia hateten.
Notísia relevante:Komisaun E husu kapasita emprezáriu timoroan partisipa obra konstrusaun
Jornalista: Abílio Elo Nini
Editór: Rafael Ximenes de A. Belo
