OÉ-CUSSE, 13 jullu 2022 (TATOLI) – Iha fulan abríl no maiu tinan ne’e, Departamentu Rejionál Transporte Terrestre no Komunikasaun Sosiál (DRTT), Rejiaun Administrativa Espesiál Oé-Cusse Ambeno (RAEOA) rekolla reseita ba kofre Estadu hamutuk $11,124.50.
“Ita-nia reseita iha transporte durante fulan rua, abríl no maiu hamutuk $11,124.50, iha fulan juñu ne’e ita seidauk sura maibé ita observa nia montante barak tanba ho prezensa tránzitu halo pasa-revista, ita-nia komunidade barak mak trata dokumentu, ne’ebé reseita ba fulan juñu sei liu fulan rua ne’e,” Xefe DRTT RAEOA, Silvestre Sila Teme, hateten iha Oé-Cusse, kuarta ne’e.
Nia informa, totál reseita hahú hosi janeiru to’o maiu hamutuk $26,128.00, kuandu totál hosi 2015 prezensa ZEESM iha Oé-Cusse to’o agora hamutuk $576,574.65, reseita hatama ba kofre Estadu iha rejiaun nian.
“Fonte orsamentu ne’e mai hosi atividade hafoun karta legál sira hanesan karta kondusaun, dokumentu inspesaun nomoos hafoun dokumentu transporte públiku tantu mikrolete no angguna inklui ema sira-ne’ebé rejista motorizada ho karreta,” nia katak.
Tuir nia, maske servisu diferente ho parte polísia unidade tranzitu maibé liña koordenasaun nafatin la’o, tanba tránzitu nia kna’ar halo operasionál ba dokumentu transporte nian, nune’e parte DRTT koopera kona-bá dokumentu.
“Ita-nia serbisu ne’e iha kooperasaun di’ak ho tránzitu, kona-ba konsulta dokumentu ruma, tanba bainbain sira mak halo apreensaun identifika dokumentu ne’ebé mate entaun ho kritéria tenke hafoun dokumentu, ne’e kooperasaun parte DNTT ho tránzitu durante ne’e la’o di’ak,” nia afirma.
Jornalista : Abílio Elo Nini
Editór : Evaristo Soares Martins
