HAK husu PR promove diálogu atu buka solusaun ba problema iha sistema judisiáriu

DILI, 15 Outubru 2026 (TATOLI)—Diretór Ezekutivu Asosiasaun HAK, Feliciano da Costa Araújo, husu Prezidente Repúblika (PR), José Ramos-Horta, atu promove diálogu entre parte relevante sira hodi buka solusaun ba problema iha sistema judisiáriu Timor-Leste, liuliu liuhusi komunikasaun ne’ebé konstrutiva entre instituisaun sira.

Feliciano hateten katak problema iha sistema judisiáriu ne’e presiza hetan atensaun husi instituisaun relevante sira, inklui Ministériu Justisa, tribunál sira no Prezidente Repúblika, ne’ebé iha kompeténsia konstitusionál atu nomea Prezidente Tribunál Rekursu (PTR).

Nia hein katak lideransa Tribunál Rekursu bele identifika no haree didi’ak lakuna sira-ne’ebé eziste, no evita atitude ne’ebé bele hamosu distánsia ka falta kooperasaun entre instituisaun sira iha setór judisiáriu.

“Ha’u-nia espetativa mak Prezidente Tribunál Rekursu fó-atensaun ba lakuna sira-ne’e. Buat ne’ebé importante mak komunikasaun, la’ós hatudu arrogánsia ba setór esensiál sira. Presiza diálogu atu buka solusaun ba problema iha sistema judisiáriu,” Feliciano hateten.

Tanba ne’e, nia husu PR atu hala’o diálogu ho parte hotu-hotu ne’ebé relevante, hodi buka solusaun ne’ebé bele hametin kooperasaun institusionál no hadi’a funsionamentu sistema judisiáriu iha Timor-Leste.

“Prezidente Repúblika mak figura importante iha Estadu. Nia iha kompeténsia atu halo intervensaun tuir ninia kna’ar. Ha’u hein katak PR bele promove diálogu ida hodi buka solusaun,” nia tenik.

Kontekstu

Iha 23 Abríl 2025, TATOLI relata katak Asosiasaun HAK rekomenda ba Prezidente Repúblika atu rona uluk hanoin husi parte relevante sira, inklui akademista no espesialista jurídika sira, molok hili Prezidente Tribunál Rekursu foun. HAK mós enfatiza importánsia transparénsia no responsabilidade iha prosesu nomeasaun.

Lee notísia relevante: Asosiasaun HAK rekomenda PR rona parte relevante molok nomea PTR foun.

Aleinde ne’e, iha 14 Setembru 2026, TATOLI relata katak Prezidente Tribunál Rekursu, Afonso Carmona, sei la prezide reuniaun ikus Konsellu Superiór Majistratura Judisiária (KSMJ) kona-ba prosesu hili kandidatu ba vaga juís, tanba kestaun inkompatibilidade no konflitu interese. Kestaun ne’e hatudu katak prosesu nomeasaun no rekrutamentu iha setór judisiáriu kontinua sai asuntu importante iha diskusaun públika.

Lee mós: PTR sei la partisipa reuniaun desizaun KSMJ ikus ba rekrutamentu juís.

Jornalista: Osória Marques

Editór: Xisto Freitas da Piedade