Irrigasaun Maliana I funsiona hikas hodi fonese bee ba área produtiva 1.050
BOBONARU, 15 Outubru 2026 (TATOLI) – Ministériu Agrikultura, Pekuária, Peska no Floresta (MAPF) loke hikas irrigasaun Maliana I hafoin empreza internasionál PT Minarta finaliza projetu reabilitasaun durante fulan ida-resin.
Fornesimentu bee irrigasaun Maliana ne’e sei reativa atividade agríkola iha área potensiál ektare 1.050-resin, ne’ebé pertense ba suku Lahomea, Raifun, Ritabou no Odomau ne’ebé durante fulan rua-resin supende atividade.
Diretora Interina Diresaun Servisu Munisipál Agrikultura, Autoridade Munisípiu Bobonaru, Joaninha Jesus, dehan ho funsionamentu irrigasaun ne’e atu aproveita hodi halo atividade agríkola, liuliu kuda modo no produtu seluk tan.
Aleinde ne’e, konxiensializa mós ba komunidade atu labele so’e lixu arbiru iha kanál irrigasaun tanba so’e fo’er arbiru sei fó impaktu ba produsaun agríkola.
“Sabaun kulit, Rinso no Sampho kulit sira ne’e ita labele naran so’e iha kanu laran, ita uza tiha tau iha nia-fatin. Se iha área bee-dalan ne’e laiha lixu fatin karik, ita bele tau iha saku ruma hodi fila bá uma mak soe iha fatin ne’ebé merese, tanba kanu ne’e la’os fatin atu so’e lixu. Bee ne’e ita presiza atu uza ba área poténsia ba agríkola ninian, se ita soe fo’er arbiru ne’e kontamina ho bee ne’e, entaun estraga ita-nia produsaun agríkola”, nia hatete.
Notísia relevante: PT. Minarta hahú normaliza kanál irrigasaun Maliana I
Iha sorin seluk, komunidade Maliana, Bendito Lopes, kontente tanba bele asesu hikas bee ho sufisiente. “Bee-kanu ida-ne’e mak ami Maliana parte kraik ne’e nia iis, tanba nia maran durante fulan ida atu ba rua ne’e, ami mós susar tebes ba bee-moos. Bee-matan, posu sira maran hotu, agora bee mai fali ona ne’e ami sente hanesan iis nakonu ona, tanba ami bele uza ba halo modo, hariis, halo to’os, halo natar, haki’ak-ikan no buat seluk”, nia dehan.
Irrigasaun Maliana I reabilita dahuluk husi Ajénsia Kooperasaun Internasionál Japaun (JICA) entre tinan 2008 no 2009, hanesan parte husi apoiu povu japonés nudar sinál amizade no kooperasaun entre nasaun rua.
Notísia relevante: Autoridade Maliana hasai sirkulár suspende atividade agríkola iha irrigasaun Maliana I
Jornalista: Sergio da Cruz
Editora: Maria Auxiliadora
