STAE Baukau hahú atualiza dadus eleitór biométriku iha postu administrativu ualu
BAUKAU, 15 Outubru 2026 (TATOLI)—Sekretariadu Tékniku Administrasaun Eleitorál (STAE) Munisípiu Baukau hahú ona prosesu resenseamentu eleitorál no atualizasaun baze dadus eleitór ba sistema biométriku, nu’udár parte ida husi preparasaun ba eleisaun prezidensiál 2027.
Diretór STAE Baukau, Natividade Freitas Guterres, hateten katak prosesu ne’e hahú iha inísiu fulan-Outubru, ho distribuisaun ekipamentu no destakamentu funsionáriu ba postu administrativu sira.
“Agora prosesu ne’e hahú ona iha postu administrativu ualu iha Munisípiu Baukau. Aleinde prodús kartaun eleitór, ami mós atualiza dadus ba sistema biométriku,” Natividade Freitas Guterres hateten ba TATOLI iha nia kna’ar fatin, Vila Nova, Baukau, Kinta ne’e.
Nia esplika katak ekipamentu ne’ebé uza iha prosesu ne’e inklui laptop no makina imprime kartaun. Iha kada postu administrativu, STAE destaka funsionáriu na’in-tolu, kompostu husi operadór sistema, asistente operadór no ofisiál pontu atendimentu.
Tuir Natividade, eleitór sira bele bá postu administrativu tuir sira-nia área resenseamentu atu rejista ka atualiza dadus pesoál, inklui troka kartaun semi-biométriku ba kartaun biométriku. Atendimentu ne’e mós inklui sidadaun sira-ne’ebé to’o ona idade atu rejista nu’udar eleitór.
“Materiál sira distribui ona ba postu administrativu hitu, enkuantu Postu Administrativu Baukau Vila nia atendimentu konsentra iha-ne’e,” nia akresenta.
Nia hatete katak, tuir kalendáriu, prosesu atualizasaun baze dadus eleitór iha Baukau sei ramata iha 22 Janeiru 2027.
Bazeia ba dadus ne’ebé STAE Baukau aprezenta, munisípiu ne’e rejista ona eleitór na’in-40.159 ho kartaun biométriku, ka 37,44% husi totál eleitór na’in-107.261. Númeru ne’e hatudu katak eleitór barak sei presiza atualiza sira-nia dadus ba sistema biométriku.
STAE Baukau enkoraja sidadaun sira-ne’ebé seidauk atualiza dadus ka seidauk iha kartaun biométriku atu aproveita períodu atendimentu ne’e, hodi garante sira-nia dadus eleitorál atuál no prepara an ba eleisaun sira tuirmai.
Kontekstu
STAE hahú distribui ekipamentu ba munisípiu sira iha 05 Outubru 2026, atu apoiu prosesu resenseamentu no atualizasaun baze dadus eleitór ho sistema biométriku. Iha 07 Outubru 2026, STAE informa katak prosesu resenseamentu biométriku hahú ona iha postu administrativu 69 iha territóriu nasionál.
Prosesu ne’e parte husi preparasaun ba Eleisaun Prezidensiál 2027. STAE loke atendimentu rejistu no atualizasaun baze dadus eleitór husi 07 Outubru 2026 to’o 22 Janeiru 2027 iha postu administrativu sira no Autoridade Administrativa Ataúru.
Lee notísia relasionada iha TATOLI:
- STAE distribui ekipamentu resensiamentu eleitorál no atualizasaun dadus biométriku
- STAE hahú halo resensiamentu eleitorál iha postu 69 iha territóriu
- Jelang Pilpres 2027, STAE buka pendaftaran dan pembaruan data pemilih hingga Januari
Jornalista: Natalino Belo
Editór: Xisto Freitas da Piedade
