Edukasaun Oekusi dezloka ona pontu ezame nasionál ba iha sub-rejiaun haat

OEKUSI, 16 Outubru 2026 (TATOLI) – Diresaun Servisu Rejionál Edukasaun Rejiaun Administrativa Espesiál Oekusi Ambeno (RAEOA), sesta ohin, dezloka ona pontu ezame nasionál husi Komandu Polísia Nasionál Timor-Leste (PNTL) ba sub-rejiaun Oésilo, Pássabe, Nítibe no Pante Makasar hodi prepara ba loron implementasaun ezame nasionál ne’ebé sei akontese iha segunda, 19 to’o 21 Outubru 2026.

Kondenadór Formasaun Diresaun Servisu Rejionál Edukasaun Oekusi, Jacinto Elo, informa, distribuisaun pontu ezame ba eskola sira-ne’ebé maka hala’o ezame nasionál hamutuk eskola 35, maibé pontu ezame hirak-ne’e sei asegura iha Eskuadra PNTL sub-rejiaun sira.

“Distribuisaun ohin loron ne’e, la’ós direita ba eskola idak-idak, maibé sei rai no asegura hela iha Komando PNTL Eskuadra sub-rejiaun idak-idak, hanesan iha Pássabe, Oésilo, Nítibe no Pante Makasar, no kada loron iha dixipliña rua, entaun bainhira ezame hahú maka sei ba foti iha eskudra PNTL sira, tanba ezame nasionál ne’e sei hala’o durante loron tolu, hahú loeon 19 to’o 21 Outubru 2026 ne’e,” nia hateten ba Ajénsia TATOLI,I.P iha Komando PNTL Oekusi, ohin.

Nia epslika, iha sub-rejiaun Pante Makasar, fahe ba rua, ba EBC Mahata, ETV Mahata, eskola Santo Antonio mak sei rai hela iha Komando PNTL Oekusi, enkuantu ETV agrikola, ETV Palaban, EBC no ESG Palaban, EBC no ESG CAFÉ sei asegura hela iha eskuadra PNTL Pante Makasar.

Notísia relevante:ME hahú distribui Pontu Ezame Nasionál 2026 ba Servisu Edukasaun Munisipál

Iha biban ne’e, Segundu Komandante PNTL Oekusi, Superentende Asistente Polísia, Herman Metan, konsidera ezame nasionál ne’e importante, nune’e PNTL sei apoia halo monitorizasaun, nune’e bele garante ezame nasionál ne’e bele la’o ho susesu.

“Parte PNTL nia kna’ar mak atu fó seguransa, ne’ebé iha períodu ezame nasionál ne’e la’o, ami sei akompaña ita bo’ot sira iha kada eskola, atu ezame ne’e bele la’o di’ak no susesu,” nia hateten.

Notísia relevante:Estudante rihun-tolu resin iha RAEOA sei hetan kartaun ezame

Entretantu, dadus estudante iha Oekusi, atu partisipa iha ezame nasioná tinan ne’e hamutuk 3.072, mai husi eskola 35 komposta husi Ensinu Báziku Sentrál (EBC, sigla portugés) hamutuk eskola 23, Ensinu Sekundáriu Jerál (ESG) iha eskola ualu no Ensinu Tékniku Vokasionál (ETV) iha eskola haat.

Jornalista: Abílio Elo Nini

Editór: Rafael Ximenes de A. Belo