Janeiru to’o Setembru 2026, EDTL Oekusi akumula reseita rihun $553-resin
OEKUSI, 20 Outubru 2026 (TATOLI) – Hahú hosi Janeiru mai to’o Setembru 2026 ne’e, Departamentu Eletrisidade Timor-Leste (EDTL) Rejiaun Administrativa Espesiál Oekusi Ambeno (RAEOA), arrekada reseita ba kofre Estadu hamutuk $553,348.00.
“Hahú Janeiru to’o Setembru ne’e, ita konsege rekolla reseita ba kofre Estadu $553,348.00. Iha fulan-Setembru de’it, ita hetan rihun $50,612.00,” Xefe Departementu EDTL Oekusi, Antão Cabal, nia hateten ba Ajénsia TATOLI,I.P iha Oekusi, ohin.
Nia esplika, reseita ne’e rekolla mai husi kliente sira-ne’ebé utiliza kontadór prepago, pospago, ligasaun foun inklui multa ka sansaun ba sira-ne’ebé halo manobra, “Ha’u la dehan dada ilegál, maibé laiha koñesimentu ba EDTL, entaun bainhira ita toman, ida-ne’e hanesan xamada atensaun, la’ós multa”.
Notísia relevante:Reseita no despeza EDTL Oekusi dezekilíbriu
Xefe departamentu ne’e informa, kona-ba sistema atendimentu, durante ne’e ekipa EDTL kontinua kobre to’o área rurál sira, liu-liu ai-rin neʼebé avária, maibé ba sira-neʼebé instala ona kontadór prepago kuaze rihun 17-resin maioria iha sub-rejiaun Pante Makasar.
Maibé komesa Novembru ba oin, sei halo ona instalasaun kobre sub-rejiaun sira hotu to’o suku no aldeia, tanba ne’e desizaun Governu.
“Ami kontinua hala’o operasaun ba kliente sira-neʼebé seidauk utiliza prepago, no mós kliente neʼebé uza ona maibé sobu halo ligasaun direita, tanba ne’e antes ne’e Autoridade halo ona konkursu públiku rezultadu mós públika ona, katak sei monta mós prepago ba iha sub-rejiaun tolu, tanba daudaun foin to’o Oébaha suku Bobometo,” nia hateten
Notísia relevante:EDTL Oekusi sei tutela fali ba Empreza Públika nasionál iha 2027
Jornalista: Abílio Elo Nini
Editór: Rafael Ximenes de A. Belo
