EDTL Oekusi sei tutela fali ba Empreza Públika nasionál iha 2027
OEKUSI, 13 Outubru 2026 (TATOLI) – Ekipa husi Eletrisidade de Timor-Leste, Empreza Públika (EDTL,EP), tersa ohin hala’o enkontru koordenasaun ho Prezidente Autoriade Rejiaun Administrativa Espesiál Oekusi Ambeno (RAEOA), hodi prepara prosesu transferénsia EDTL Oekusi ba EDTL,EP nasionál iha 2027.
“Iha tinan oin, EDTL Oekusi sei ba hamutuk ho EDTL nasionál iha empreza públika, tan ne’e ohin ita mai enkontru koordenasaun kontinuasaun ho Autoridade RAEOA, tanba iha antes ne’e Prezidente EDTL,EP ho ekipa ida mai halo ona koordenasaun, ohin nafatin kontinua koordena atu prepara halo didi’ak prosesu transferénsia husi EDTL Oekusi ba EDTL,EP nasionál,” hateten Komisáriu Ezekutivu Servisu Koorporativu EDTL,ep, Júlio de Jesus Gonçalves, ba jornalista sira, hafoin enkontru ho Prezidente RAEOA iha Oekusi, ohin.
Notísia relevante:EDTL identifika fatin tolu potensiál iha Oekusi ba instalasaun Sistema Solár PV
Nia esplika, razaun prinsipál husi prosesu transferésia ne’e atu haree servisu melloria sistema eletrisidade ne’e úniku, tanba eletrisidade iha Timor-Leste ida de’it, maibé Oekusi ketak entaun iha mudansa ba dekretu-lei sira-ne’ebé antes ne’e RAEOA hanesan Zona Ekonomia Espesiál no Rejiaun Espesiál, maibé agora muda ona.
“Entaun ida-ne’e tuir duni ona rezolusaun ne’ebé maka iha, ita atu haree akumula hotu sai ida de’it ba servisu atendimentu ne’e konsentradu,” nia hateten.
Notísia relevante:Xefe operasaun EDTL Oekusi preokupa ho sira-nia estatutu
Prezidente Autoridade RAEOA, Régio da Cruz Salu, konsidera enkontru koordenasaun ho objetivu mellora jestaun ba servisu instituisaun funsionál ba instituisaun indireita Estadu nian iha Ministériu Obra Públika (MOP) hodi garante seguransa enerjia no garante investimentu ba reseita ba Estadu.
“Oekusi bazeia ba lei númeru 3/2014, nu’udar autonómia patromoniál, ita investe iha aset ida atu asegura nesesidade enerjia no seguransa enerjia dezde 2015, agora tinan barak servisu rua ne’e la halo hotu dala ida, maibé institusionálmente ita seidauk halo jestaun separada nune’e bele halo servisu di’ak,” nia hateten.
Nia afirma, tanba kestaun dezenvolvimentu institusionál, nune’e iha tinan ne’e Autoridade RAEOA deside hamutuk ho MOP tranzitóriamente RAEOA hetan apoia atu halo jestaun ba funsionamentu sentrál elétrika, maibé funsionáriu públiku sira, servisu planeamentu no institusionál téknika administrativa, nafatin iha RAEOA. Agora nia mekanizmu atu garantia servisu la’o, hodi evita servisu paralelu institusionál, entaun ita sei ko’alia.
“Dalan ne’e iha rua, RAEOA bele asina akodru ho EDTL,EP, nune’e funsioná
riu sira-ne’ebé servisu iha sentrál elétrika bele ba EP, ou RAEOA tranzitoriamente EDTL EP harii mós instituisaun funsionál ida atu jere sentrál elétrika Oekusi, tanba lei númeru 3/2014 seidauk iha mudansa, fó kompeténsia autonómia administrativa finanseiru no patrimoniál ba asset ne’e atu jere,” nia hateten.
Notísia relevante:Reseita no despeza EDTL Oekusi dezekilíbriu
Jornalista: Abílio Elo Nini
Editór: Rafael Ximenes de A. Belo
