Uma-kain hitu iha suku Bobometo Oésilo seidauk asesu liña elétrika
OEKUSI, 20 Outubru 2026 (TATOLI) – Uma-kain hitu, ne’ebé hela iha aldeia Nonkikan suku Bobometo sub-rejiaun Oésilo, Rejiaun Administrativa Espesiál Oekusi Ambeno (RAEOA), dezde Timor-Leste ukun rasik-an to’o agora seidauk asesu liña elétrika.
Tanba ne’e, Suku Bobometo, José Labi Caet, rekomenda ba Governu liuhusi Autoridade RAEOA, iha futuru bele konsidera hosi halo instalasaun kona-ba iluminasaun nian.
“Suku Bobometo iha aldeia sia, maioria asesu ona estrada maske reabilitasaun de’it, só úniku uma-kain hitu iha aldeia Nonkikan fatin izoladu ida naran Bitopa, maka seidauk asesu liña elétrika, inklui estrada tanba hela do’ok husi estrada boot,” nia hateten iha sede suku Bobometo, foin lalais.
Notísia relevante:Abitante 16 iha Bairru Sikone Pante Makasar seidauk asesu bee-moos no liña elétrika
Nia informa, uma-kain hitu ne’e, seidauk hetan apoia ruma husi Governu hanesan solár panel, no asuntu ne’e, Autoridade Kounitáriu suku Bobometo, rekomenda bebeik on aba Governu liuhusi Autoridade RAEOA maibé seidauk hetan konsiderasaun ruma.
“Tanba ne’e, ha’u espera tinan ne’e, Autoridade RAEOA bele tau ona atensaun, tanba ita barak hetan ona naroman iha tempu kalan, maibé uma-kain hitu ho sira-nia família sei kontinua hela nakukun,” nia rekomenda.
Notísia relevante:Uma-kain 50-resin iha suku Usitaku-Nítibe seidauk asesu liña elétrika
Hatan ba rekomendasaun ne’e, Pontu Vokál EDTL Oekusi, Antão Cabal, rekoñese, tanba uma-kin hitu referida kontinua hela ha fatin izoladu, do’ok husi rede distribuisaun no labele asesu estrada ho di’ak.
“Fatin ne’e parte EDTL halo ona levantamentu distánsia kuaze kilometru tolu do’ok husi rede distribuisaun ka ai-rin sira, ne’eb’e ita tau ona planu, karik iha futuru ita halo instalasaun ruma, ita sei kobre, maibé alternativa seluk ne’ebé ita prepara maka sei fornese solar panél hodi hein liña elétrika, tanba fatin ne’e izoladu duni,” nia hateten.
Notísia relevante:EDTL sei halo levantamentu dadus komunidade ne’ebé seidauk asesu liña elétrika
Jornalista: Abílio Elo Nini
Editór: Rafael Ximenes de A. Belo
