OEKUSI, 19 Setembru 2025 (TATOLI) – Komunidade uma-kain 53 iha bairru Tua-Leu aldeia Kuantua suku Usitaku sub-rejiaun Nítibe, Rejiaun Administrativa Espesiál Oekusi Ambeno (RAEOA), seidauk asesu liña elétrika.
Tanba ne’e, Xefe Suku Usitaku, Hilario Babo, rekomenda ba Autoridade RAEOA atu konsidera, tanba antes komunidade sira asesu ona liuhusi solár-panél maibé kondisaun aat ona.
“Problema ne’ebé durante ne’e komunidade sira enfrenta mak ahi, tempu-naruk sira uza de’it ahi-oan, foin daudaun Estadu fornese solar-panél, maibé agora balun aat ona, tanba ne’e liuhusi oportunidade ne’e, ami rekomenda ba Autoridade RAEOA, bele tau iha programa ba futuru bele rezolve netik,” nia hateten iha ámbitu inaugurasaun bee-moos iha aldeia Kuantua, ohin.
Notísia relevante: https://tatoli.tl/2025/09/19/alargamentu-estrada-iha-suni-ufe-la-rega-no-hamosu-rai-rahun-komunidade-triste/
Iha fatin hanesan, abitante Jaime Taku, reforsa-tan katak, bainhira atu karrega batéria telemovél, obrigatóriu tenke la’o do’ok ba to’o Nítibe sentrál, tanba dezde ukun aan to’o agora seidauk asesu liña elétrika.
“Ami rekoñese, uluk Governu fornese solar-panél maibé agora aat hotu ona, ne’ebé ami atu cas (karrega) telefone ami buka fali iha leten to’o Nítibe sentru mak foin bele cas, tanba ami seidauk asesu kuaze dezde ita ukun to’o agora,” nia hateten.
Ba kestaun ne’e, Diretór Diresaun Rejionál Administrasaun, José Tanesib Anunu, hateten, “Rekomendasaun sira-ne’e importante, nune’e Governu bele konsidera, tanba agora komunidade sira mós asesu ona estrada, entaun ahi ne’e importante, entaun asuntu ne’e ita ne’e informa ba Prezidente Autoridade tau iha planu futuru, nune’e bele rezolve”.
Notísia relevante: https://tatoli.tl/2025/09/19/komunidade-uma-kain-30-iha-ossokaia-afaloikai-asesu-ona-eletrisidade/
Entretantu, totál komunidade iha bairru Tua-Leu aldeia Kuantua perténsia ba suku Usitaku hamutuk 300-resin husi uma-kain-53.
Jornalista: Abílio Elo Nini
Editór: Rafael Ximenes de A. Belo
