Agrikultór sira iha Maliana reativa atividade agríkola
BOBONARU, 21 Outubru 2026 (TATOLI)-Agrikultór sira iha postu administrativu Maliana, munisípiu Bobonaru, ho entuziasmu prepara rai no viveiru hodi reativa atividade agríkola hafoin autoridade postu hasai sirkulár hodi suspende temporária iha fulan-Agostu liubá tanba reabilitasaun ba irrigasaun Maliana I.
Agrikultór Sabino do Santos Lopes dehan dezde semana kotuk sira halo preparasaun ba terrenu atu kuda modo no produtu agríkola seluk, tanba asesu ona bee husi kanál irrigasaun Maliana ne’ebé loke ofisialmente iha loron 15 fulan-Outubru.
“Agora bee mai ho di’ak ona, horisehik ami komesa kuda modo-mutin, kanko, brinjela, pepollu, tomate, ai-manas, batar, tanba fulan rua liu ami la halo modo. Agora, ami komesa kuda fali para hetan netik osan, tanba ami-nia moris depende liu ba ida-ne’e”, nia informa ba Tatoli, ohin.
Iha sorin seluk, Xefe Suku Ritabou, Maximiano dos Santos Araújo, fiar katak irrigasaun Maliana nafatin fornese bee ba agrikultór sira ho sufisiente hodi permite sira halo atividade ho normál.
Notísia relevante: Autoridade Maliana hasai sirkulár suspende atividade agríkola iha irrigasaun Maliana I
“Antes ne’e balun kuda tiha modo, tomate, buat barak, depois ida-ne’e bee la mai, maibé semana kotuk ita loke bee mai ona. Klaru katak agora balun komesa hadi’a fali fatin para kuda filafali. Horisehik ha’u bá kraik balun kuda fali modo ona, tanba agrikultór nia vida mak ne’e”, nia dehan.
Aleinde ne’e, negosiante merkadu Maliana, Natália Soares, konsidera reativa atividade agríkola ne’e fasilita mós negosiante sira atu sosa modo ho besik no presu razoavel.
“Foin lais ne’e, sira iha Balibó, Kailaku no seluk tan mak lori mai. Modo folin nafatin, maibé uitoan de’it, tanba modo iha Maliana laiha, ami sosa tutan, fa’an fali mós ema sosa la di’ak, tanba kesi futun ki’ik de’it, más ba oin ne’e folin di’ak ona, tanba sira komesa kuda fali modo ona”, nia realsa.
Natália mós relata katak daudaun ne’e bee-matan Mugis mós moris filafali, hafoin irrigasaun Maliana I funsiona hikas.
Tuir observasaun jornalista Tatoli, bee-matan Raeboanan mak seidauk moris filafali, maibé posu privadu balun ne’ebé besik kanál irrigasaun bee-moris fali maski debitu sei menus.
Área potensiál agríkola iha irrigasaun Maliana hamutuk ektare 1.050-resin, ne’ebé pertense suku Lahomea, Raifun, Ritabou, Odomau, inklui Holsa.
Notísia relevante: MAPPF orienta PT. Minarta normaliza irrigasaun Maliana I
Jornalista: Sergio da Cruz
Editora: Maria Auxiliadora
