KO 25 husu Governu konstrui fatin própriu prezerva dokumentu luta libertasaun nasionál
DILI, 22 Outubru 2026 (TATOLI)—Komité Orientadór (KO) 25 ne’ebé lideradu husi Constâncio Pinto hala’o enkontru ho Primeiru-Ministru, Kay Rala Xanana Gusmão, hodi atualiza servisu no husu Governu atu konstrui fatin própriu hodi prezervasaun ba dokumentu istóriku luta libertasaun nasionál nian.
Prezidente Komité Orientadór 25, Constâncio Pinto, hateten ohin Komité orientadór 25 iha previléjiu hasoru Primeiru-Ministru, hodi atualiza kona-ba sira-nia servisu liga ho perkiza estória luta libertasaun nian no planu servisu ba tinan 2027.
Notísia Releavnte: Komité Orientadór 25 aprezenta prosesu hakerek istória rezisténsia ba Parlamentu
“Ami mós aprezenta livru luta ba libertasaun nasionál tolu ba Xefe Governu, tanba livru hirak-ne’e prontu ona atu lansa. Tanba ne’e, ha’u tebes ho servisu Komité Orientadór 25 nian, nune’e nia nafatin fó apoiu mai ami liuliu mandatu komité ba tinan lima,” Prezidente komité ne’e informa ba jornalista sira iha Palásiu Governu, ohin.
Tuir nia, iha asuntu seluk tan ne’ebé sira diskute kona-ba orsamentu ne’ebé sei aloka ba komité hodi ezerse ninia atividade sira ho di’ak no ko’alia mós kona-ba fatin ba komité, tanba sira halo peskiza durante tinan barak ona no planu sei translada dokumentu istóriku relasiona ho timoroan sira-nia luta sira husi Austrália, Portugál lori fali mai iha Timor.
“Nune’e, ami presiza fatin dignu hodi konserva dokumentu istóriku sira-ne’e. Maibé ohin Primeiru-Ministru orienta ami atu kontinua halo peskiza no edukasaun sívika kona-ba ita-nia istória ba timoroan hotu tanba jerasaun sira presiza hatene,” nia dehan.
Notísia Releavnte: Komité Orientadór 25 hakerek ona istória rezisténsia husi 1974 to’o 1975
Jornalista : Alexandra da Costa
Editór : Cancio Ximenes
