Delegasaun Floresta Bobonaru prepara ai-oan rihun 22 atu konserva bee-matan
BOBONARU, 27 Outubru 2026 (TATOLI) – Delegasaun Territoriál Floresta, Kafé no Planta Industriál Munisípiu Bobonaru prepara ona ai-oan hun rihun 22 atu distribui ba grupu komunidade, hodi apoia atividade konservasaun bee-matan no prevensaun erozaun iha munisípiu ne’e.
Koordenadór Delegasaun Territoriál Floresta, Kafé no Planta Industriál Munisípiu Bobonaru, Casemiro Lopes, hatete katak husi total ai-oan 22.000 ne’e, ai-oan 12.000 prepara liuhusi apoiu viveiru komunitáriu iha nasionál, enkuantu ai-oan 10.000 seluk prepara ho apoiu husi parte extensaun Diresaun Agrikultura Munisípiu Bobonaru.
Nia esplika katak ai-oan hirak ne’e prepara iha Viveiru Komunitáriu Sentru Tunubibi atu fasilita grupu komunidade atu kuda iha tempu udan, iha área sira ne’ebé iha risku erozaun no bee-matan sira ne’ebé presiza konservasaun.
Notísia relevante: SEF kuda ai-parapa 5.000 iha Bee Malae hodi reforsa konservasaun ekosistema kosteiru
Casemiro hatutan katak, foin lalais ne’e, Servisu Munisipál Água, Sañeamentu no Ambiente (SMASA) hamutuk ho Autoridade Protesaun Sivíl husu ai-oan hun 500 atu uza iha atividade ne’ebé sira planeia hela.
Casemiro Lopes hateten katak viveiru iha sentru Tunubibi prepara tipu ai-horis oioin, inklui ai-produsaun, ai-urbana, ai-konservasaun no ai-agrofloresta.
Ai-urbana ne’e atu kuda iha estrada ninin, enkuantu ai-konservasaun sei fasilita ba komunidade sira atu kuda iha bee-matan, hodi ajuda mantein bee no prevene bee-matan maran.
Nia husu mós ba komunidade atu halo lutu hale’u bee-matan ne’ebé sira kuda ai-oan, atu proteje ai-horis husi animál no evita estragu durante prosesu dezenvolvimentu.
Tuir Casemiro Lopes, iha tinan 2025, delegasaun ne’e fasilita ona ai-oan hun 1.000 ba SMASA, bazeia ba proposta konservasaun bee-matan no atividade reabilitasaun iha área risku iha Bobonaru.
Aleinde SMASA, delegasaun ne’e mós fasilita ai-oan ba komunidade no igreja sira, tuir proposta ne’ebé sira aprezenta.
Nia rekoñese katak dezafiu ida ne’ebé hasoru iha implementasaun programa ne’e mak tempu kuda ai-oan ne’ebé dalaruma la tuir kalendáriu udan nian. Situasaun ne’e bele halo ai-oan balun la moris tanba kuda tarde liu.
“Ami nia hakarak ami fasilita ai-oan ne’e iha tempu ne’ebé udan tau rai, liuliu Dezembru, Janeiru, Fevereiru, liu ida-ne’e la’e ona”, nia dehan.
Notísia relevante: SMASA Bobonaru hametin konservasaun bee-matan hasoru El Niño
Jornalista: Sergio da Cruz
Editora: Maria Auxiliadora
