Kazu asu pozitivu raiva iha Vikeke sa’e ona bá 30, falta transporte sai dezafiu ba veterináriu
VIKEKE, 27 Outubru 2026 (TATOLI)—Kazu asu pozitivu ba vírus raiva iha Munisípiu Vikeke aumenta ona bá 30 iha semana ida-ne’e, enkuantu falta transporte no ekipamentu teste limitadu sai obstákulu ba tékniku veterináriu sira atu hametin prevensaun no kontrolu ba moras ne’e.
Xefe Departamentu Veterináriu Munisípiu Vikeke, Domingos do Carmo Pinto, informa katak rezultadu ne’e bazeia ba teste amostra asu nian ne’ebé tékniku veterináriu sira halo iha kada loron.
“Kona-ba kazu raiva iha Munisípiu Vikeke, iha semana ida-ne’e ami rejista ona asu hamutuk 30 mak pozitivu ba raiva. Númeru ne’e bazeia ba rezultadu teste amostra asu nian ne’ebé ami halo iha kada loron, no rezultadu sira hatudu katak kazu pozitivu aumenta,” Domingos do Carmo Pinto hateten ba TATOLI, iha nia fatin servisu, Beloi, Tersa ne’e.
Xefe Departamentu Veterináriu ne’e esplika katak tékniku veterináriu sira hahú rejista kazu asu pozitivu raiva husi fulan Juñu to’o Outubru 2026, liuliu husi asu ne’ebé tata ema no amostra husi asu hirak-ne’e ne’ebé lori ba teste.
“Asu sira-ne’ebé tata komunidade mak ami foti amostra hodi halo teste. Maibé, asu ne’ebé la tata ema, ami la halo teste ba sira tanba ekipamentu teste ne’ebé ami iha limitadu. Asu sira-ne’ebé rejista pozitiva ba raiva ne’e hotu laiha na’in. Ami lahatene sira mai husi ne’ebé, tanba bainhira ami husu ba komunidade, sira mós la koñese asu hirak-ne’e,” nia haktuir.
Nia dehan katak, durante períodu ne’e, tékniku veterináriu sira kontinua vizita komunidade nia uma no halo sosializasaun kona-ba vírus raiva, tanba moras ne’e bele kauza mate ba ema se la hetan prevensaun no tratamentu apropriadu.
“Atu komunidade bele komprende kona-ba vírus raiva, ami kontinua halo sosializasaun. Komunidade balun dehan katak ami bosok, no vírus raiva ne’e laiha. Tanba ne’e, ami presiza esplika didi’ak atu komunidade bele komprende katak moras ne’e iha duni no perigu ba sira-nia saúde,” nia akresenta.
Kona-ba prevensaun, Domingos do Carmo Pinto dehan katak tékniku veterináriu sira kontinua fó vasina ba asu sira. Maibé, falta transporte sai obstákulu ida ba ekipa veterinária atu halo servisu vasinasaun iha postu administrativu no área sira-ne’ebé dook.
“Ami-nia dezafiu mak transporte, tanba ne’e ami susar atu ba postu administrativu sira. Iha fulan-Maiu 2026, ami halo ona pedidu ba nivel nasionál atu hetan transporte, maibé to’o agora seidauk iha resposta. Tanba ne’e, ami fó vasina ba asu sira iha fatin sira-ne’ebé besik de’it,” nia dehan.
Nune’e, nia informa katak estoke vasina ba asu ne’ebé disponivel iha postu administrativu sira hamutuk 1.000 doze, ne’ebé aloka atu fó vasina ba asu komunidade nian hodi prevene vírus raiva.
Tuir dadus Departamentu Veterináriu Munisípiu Vikeke, kazu asu pozitivu raiva hamutuk 30 ne’e fahe ba postu administrativu haat: Ossú rejista kazu haat (4), Uatulari rua (2), Lakluta tolu (3) no Vikeke Vila 21. To’o agora, Postu Administrativu Uatukarbau seidauk rejista kazu asu pozitivu raiva.
Kontestu
Iha notísia ne’ebé TATOLI publika iha 07 Outubru 2026, kazu asu pozitivu raiva iha Munisípiu Vikeke aumenta ona ba 24. Iha relatóriu ne’e, Xefe Suku Ahik, Ercílio Soares, husu ba Ministériu Agrikultura, Peska, Pekuária no Floresta no Diresaun Veterinária atu aselera intervensaun, inklui sosializasaun no vasinasaun ba asu sira. Falta rekursu no transporte mós sai dezafiu ba ekipa veterinária atu halo prevensaun iha área afetada.
Lee notísia relevante sira:
- Kazu raiva iha Vikeke sa’e ona ba 24, autoridade Ahik husu Diresaun Veterinária halo intervensaun
- Servisu Saúde Munisípiu Vikeke rejista ema 200 asu tata, prevensaun raiva sai prioridade
Jornalista: Vitorino Lopes da Costa
Editór: Xisto Freitas da Piedade
