Kazu Raiva iha Vikeke sa’e ona bá 24, Autoridade Ahik husu Diresaun Veterinária halo intervensaun
VIKEKE, 07 Outubru 2026 (TATOLI)—Xefe Suku Ahik, Postu Vikeke Vila, Munisípiu Vikeke, Ercílio Soares, husu Ministériu Agrikultura, Peska, Pekuária no Floresta (MAPPF), Diresaun Veterinária presiza aselera halo intervensaun hodi kontra vírus raiva iha Munisípiu Vikeke.
“Horisehik Tersa (05/10) ne’e iha ha’u-nia Suku Ahik asu tata ai arbiru, depoiz kaben sulin, la’o bulelu hela. Nune’e, ami deside oho tanba ita haree katak asu ne’e afeta ona ba vírus raiva. Tan ne’e, ami husu ba ministériu relevante tenke halo intervensaun sedu liuliu ba prevensaun nian, atu labele afeta ba ita-nia komunidade,” Xefe Suku Ahik, Ercílio Soares ba TATOLI, iha Postu Vikeke Vila, Kuarta ne’e.
Notísia relevnte: https://tatoli.tl/2026/09/29/veterinariu-vikeke-rejista-kazu-asu-pozitivu-raiva-sae-ba-22/
Autoridade ne’e prefere presiza halo sosializasaun ba komunidade iha aldeia no suku sira tanba agora daudaun kazu asu pozitivu rejista ona iha Munisípiu Vikeke nune’e presiza halo prevensaun ba asu sira.
“Ami sujere ba parte relevante sira presiza tun ba baze halo sosializasun no fó vasina ba asu sira iha aldeia no suku sira. Karik parte relevante tun iha baze, ami autoridade lokál prontu la’o ho hamutuk ho sira tama-sai aldeia para halo prevensaun raiva,” nia hato’o.
Hatán ba preokupasaun ne’e, Xefe Departamentu Veterináriu Munisípiu Vikeke, Domingos do Carmo, haktuir kona-ba prevensaun ba vírus raiva mak presiza halo vasinasaun ba balada (asu) sira, maibé Veterináriu Vikeke menus rekursu no transporte laiha ida-ne’e mak sai dezafiu ba Veterináriu Munisípiu Vikeke.
“Kona-ba prevensaun vasina ba asu, ita seidauk la’o tanba ita menus rekursu. Ita-nia tékniku na’in- haat mak daudauk ne’e ba hela tuir formasaun iha Dili. Depoiz ami-nia dezafiu ida mak transporte laiha, entaun ami tun ba kampu susar tebes. Husi ami-nia preokupasuan sira-ne’e ami relata hotu ona bá nasionál, maibé seidauk fó resposta ba ami-nia preokupasaun,” nia dehan.
Nune’e, nia fó hanoin ba komunidade katak kuandu asu tata ona komunidade ruma tenke lori lalais ba fasilidade saúde no informa mós ba veterináriu hodi teste asu.
“Tanba daudaun ne’e ita rejsita tan rua husi Vikeke Vila no Ossú ne’ebé ita-nia kazu asu pozitivu raiva sa’e ona bá 24. Asu barak mak ami labele teste tanba distánsia dook hanesan iha Builó no Nahareka,” Ercílio haktuir.
Tuir dadus, kazu asu pozitivu raiva ne’ebé rejistadu iha Munisípiu Vikeke totál hamutuk 24 kompostu husi Postu Vikeke Vila asu pozitivu raiva 18, Postu Uatulari rua (2) no Postu Ossú rua (2) no Postu Lakluta pozitivu rua (2).
Jornalista: Vitorino Lopes da Costa
Editór: Xisto Freitas da Piedade
