Delegasaun UE diskute ho PM Xanana kona-ba partisipasaun iha Eleisaun Prezidensiál
DILI, 28 Outubru 2026 (TATOLI)-Observadór Eleitorál husi Uniaun Europeia, ne’ebé hetan akompaña husi Ministru Administrasaun Estatál, Tomás Cabral, hasoru malu ho Primeiru-Ministru (PM), Xanana Gusmão, hodi aborda kona-ba partisipasaun Uniaun Europeia iha Eleisaun Prezidénsial ne’ebé sei realiza iha tinan oin.
Embaixadór Uniaun Europeia iha Timor-Leste, Thorsten Bergfrede, hatete objetivu husi sorumutu ne’e atu diskute kona-ba Eleisaun Prezidensiál no sistema eleitorál iha Timor-Leste. “Tanba Uniaun Europeia hetan konvite atu sai hanesan observadór dala-ida tan ba Eleisaun Prezidénsiál ne’ebé sei akontese iha tinan oin”, Embaixadór Uniaun Europeia hatete iha Palásiu Governu, ohin.
Nia realsa katak delegasaun ne’e inklui peritu sira iha área polítika, lei, no lojístika, ne’ebé iha knaar atu avalia se kondisaun iha Timor-Leste adekuada ka la’e ba Uniaun Europeia atu filafali hodi partisipa nu’udar observadór iha eleisaun.
Diplomata ne’e relata katak diskusaun sira la’o di’ak tebes, tantu ho Governu komu ho sosiedade sivíl, inklui Primeiru-Ministru, membru Governu sira, reprezentante mídia sira, no partidu polítiku sira hotu.
“Konversa ho Primeiru-Ministru ne’e enkoraja tebes. Nia haree Misaun Observasaun Eleitorál Uniaun Europeia nian hanesan instrumentu ida atu ajuda konsolida Estadu iha Timor-Leste no fó kredibilidade ba rezultadu eleitorál sira. Ida-ne’e konversa ida ne’ebé pozitiva tebes”, nia haktuir.
Notísia relevante: UE no parseiru internasionál avalia apoiu ba misaun observasaun Eleisaun Prezidensiál 2027
Jornalista: Arminda Fonseca
Editora: Maria Auxiliadora
