Edukasaun Kovalima identifika presiza konstrui rezidénsia ba profesór iha eskola 19
KOVALIMA, 29 Outubru 2026 (TATOLI) – Servisu Munisipiu Edukasaun Kovalima liuhusi, Diresaun Dezenvolvimentu Parke Eskolár liuhusi tekniku sira identifika ona eskola 19 ne’ebé presiza konstrui uma ba profesór atu fasilita sira-nia hela metin hodi garante prosesu aprendizajen.
Xefe Departamentu Dezenvolvimentu Parke Eskolár, Servisu Edukasaun Munisípiu Kovalima, Benedicto Asa, informa ba TATOLI iha Santa Rosa, katak proposta konstrusaun uma ba profesór sira ne’e submete ona ba nivel nasionál, maibé implementasaun sei hala’o tuir faze depende ba disponibilidade orsamentu.
“Ita identifika ona eskola 19 ne’ebé presiza konstrui uma ba profesór. Proposta ne’e submete ona ba nivel nasionál, maibé konstrusaun labele hala’o hotu iha tempu hanesan tanba depende ba orsamentu,” nia hatete.
Eskola sira ne’ebé identifika atu hetan konstrusaun uma ba profesór ne’e distribui iha postu administrativu Zumalai, Suai, Maucatar, Tilomar, Fatumea, Fohorem no Fatululik. Iha Postu Administrativu Zumalai, eskola sira ne’e inklui EBF Lepo, EBF Salasa, EBF Bulo 1, 2 no 3, EBF Usecai, EBF Tahilin no EBF Pelete-Oebaba.
Iha Postu Administrativu Suai, eskola sira ne’ebé temi mak EBC Gala 1, 2 no 3, no EBF Halik. Iha Maucatar, inklui EBF Lela. Iha Postu Administrativu Tilomar, eskola ne’ebé identifika mak Eskola Sekundária Jerál Filial Salele, EBF Foho Lulik no EBF Fatuk Metan. Iha Fatumea, inklui ESGP Filial Fatumea, EBF Mota Ulun no EBF Macocon.
Enkuantu iha Fohorem, eskola sira ne’e mak EBC Dato Tolu no EBF Aitos. Iha Fatululik, eskola ne’ebé identifika mak EBC Fatululik.
Konstrusaun uma ba profesór iha eskola sira ne’e espera bele apoia profesór sira-nia kondisaun servisu no kontribui ba hadi’a kualidade edukasaun iha Munisípiu Kovalima.
Iha sorin seluk alunu husi eskola sekundáriu jerál Filial Fatumea, Maria Lopes dehan Ministériu Edukasaun presiza atu konstrui eskola sekundáriu jerál públiku Fatumea tanba eskola dadaun ne’e nia kondisaun ladun seguru ba alunu sira atu hala’o prosesu aprendijazen
“Ami konsidera eskola laiha kondisaun atu hala’o prosesu aprendijazen tanba eskola dadaun ne’e eskola laiha sitina, nune’e bainhira estudante presiza tenke ba hotu ai-laran no bainhira tempu udan labele hala’o prosesu aprendijazen”, nia afirma.
Notisia relevante: Ministra Dulce promete hadi’a kondisaun profesór no ezije disiplina iha sala-aula
Jornalista: Celestina Teles
Editór: Florencio Miranda Ximenes
