El Niño ameasa produsaun ai-han, SMAPPF prepara fini ba agrikultór
VIKEKE, 29 Outubru 2026 (TATOLI)—Fenómenu El Niño ne’ebé bele hamosu bailoron naruk sai preokupasaun ba agrikultór sira iha Munisípiu Vikeke. Entretantu, Servisu Munisipál Agrikultura, Peska, Pekuária no Floresta (SMAPPF) prepara fini hare tonelada 12, fini batar tonelada lima no fini foremungu ne’ebé preparadu ona husi nivel nasionál bá Vikeke.
Diretór SMAPPF Munisípiu Vikeke, Olívio Freitas Soares, informa katak fini hare tonelada 12 no fini batar tonelada lima prepara ona atu apoia agrikultór sira iha postu administrativu lima iha munisípiu ne’e.
Fini hirak-ne’e sei sai parte hosi esforsu atu apoia agrikultór sira prepara toos hodi responde ba impaktu potensiál hosi El Niño.
Olívio mós aviza ba agrikultór sira atu prepara an hasoru posibilidade bailoron naruk, liuhusi jere ho di’ak sira-nia produtu ai-han, hanesan hare, batar no produtu seluk, tanba kondisaun bailoron tuir projesaun bele kontinua to’o fulan-Abríl.
Fenómenu El Niño bele hamenus udan no hamosu bailoron naruk, ne’ebé iha poténsia atu afeta disponibilidade bee, produsaun agríkola no rendimentu família sira-ne’ebé depende ba toos. Tanba ne’e, preparasaun fini no jestaun rezerva ai-han sai importante atu hamenus risku ba agrikultór sira.
Tuir dadus hosi SMAPPF Vikeke, munisípiu ne’e iha área potensiál agríkola ektare 23.043 no área kultivada ka área toos potensiál ektare 1.552,97. Área hirak-ne’e kobre postu administrativu Uatulari, Uatukarbau, Vikeke Vila, Lakluta no Ossú.
Kontestu
Autoridade Protesaun Sivíl (APC) aviza kona-ba impaktu potensiál hosi El Niño, ne’ebé bele kontinua to’o Abríl 2027. Fenómenu ne’e bele hamenus udan no aumenta risku bailoron naruk, ho impaktu ba agrikultura no disponibilidade ai-han.
Lee notísia relevante: APC alerta kona-ba impaktu El Niño ne’ebé bele kontinua to’o Abríl 2027.
Iha nivel nasionál, Ministériu Agrikultura, Pekuária, Peska no Floresta (MAPPF) mós prepara distribuisaun fini batar no medida sira atu responde ba ameasa El Niño.
Lee mós: MAPPF distribui fini batar no prepara medida hasoru El Niño.
Iha Vikeke, SMAPPF hahú apoiu agrikultór sira iha Postu Administrativu Uatulari ho tratór boot rua atu fasilita servisu fila-rai no prepara toos.
Lee tan: SMAPPF Vikeke apoia tratór boot ba agrikultór Uatulari hodi fila-rai.
Jornalista: Vitorino Lopes da Costa
Editór: Xisto Freitas da Piedade
