Komunidade Molop-Taz preokupa ho estrada aat no asesu internét limitadu
BOBONARU, 29 Outubru 2026 (TATOLI)-Komunidade preokupa ho estrada iha aldeia Molop-Taz liga bá sentru suku Molop, postu administrativu Bobonaru, munisípiu Bobonaru, no husu ba Ministériu Obra Públika (MOP) atu tau prioridade hodi rezolve tanba estrada nia kondisaun atuál grave loos.
Xefe Aldeia Molop-Taz, Lídia de Jesus Leite, haktuir katak estrada ne’e difikulta tebes movimentu transporte, liuliu karreta tanba nakonu ho fatuk.
“Estrada iha aldeia Molop-Taz aat. Komunidade sira atu bá fa’an produtu lokál, animál ruma, susar, fatuk nakonu, ita ho motór, karreta hanesan la’o iha mota-laran, baibain ema dehan atu bá Molop karik só ema fuan boot, to’o dalan klaran de’it bele fila”, nia dehan.
Autoridade ne’e realsa katak bainhira iha tempu udan susar atu viajen bá-mai, liuliu ferik ho katuas sira, ema moras, inan isin-rua atu partu no lori bá ospitál la di’ak. “Depois mota mós boot, ne’ebé husu ba na’i-ulun sira tau-matan netik ba tanba ami-nia suku ne’e izoladu”, nia hato’o.
Notísia relevante: Abitante Anapál preokupa ho kondisaun estrada husi Molop bá Sibuni
Aleinde problema estrada, Lídia mós relata katak aldeia Molop-Taz mós enfrenta problema asesu liña internét la di’ak tantu tempu bailoro komu udan.
“Iha ne’e, liña Timor Telecom no Telemor susar loos. Natoon Telemóo mai atu monta antena iha leten, más la halo, ne’ebé husu imi atu tau atensaun tanba ida-ne’e mós importante hotu”, nia dehan.
Xefe suku Molop, António Maia, haktuir katak autoridade suku hato’o ona proposta ba Ministériu Obra Públika (MOP) atu konsidera hodi rezolve estrada referida.
“Lahatene pedidu ne’e tama sira aprova ka la’e, makbé tuir informasaun ne’ebé ha’u hetan husi administradór postu Bobonaru katak iha tempu badak ekipa MOP atu mai verifika fatin ne’e. Ha’u hein de’it, finadu liu ne’e sira atu mai ka la’e? Sira presiza haree, nune’e projetu foun estrada ida liga husi Sibuni mai Molop-Taz bele kontinua”, nia espera.
Xefe Suku António Maia mós lamenta ho projetu reabilitasaun estrada liga husi suku Sibuni ba aldeia Mape-Op tanba estrada referida laiha ona kontinuasaun kompara ho estrada aldeia Molop-Taz.
“Estrada Sibuni bá aldeia Mape-Op ne’e atu labele kontinua ona, más Governu bele tau-matan ba estrada husi Molop-Taz liga bá sentru suku, tanba nia kontinuasaun ne’e bele liga husi postu administrativu Bobonaru bá postu Lolotoe no postu Zumali, munisípiu Kovalima”, nia dehan.
Nia subliña katak pedidu ne’e dirije ba MOP tanba estrada referida ho distánsia kilómentru tolu-resin, nune’e labele rezolve liuhusi Programa Nasionál Dezenvolvimentu Suku (PNDS).
“Ami koko atu rezolve ho PNDS, maibé programa ne’e ninia osan mak la sufisiente atu halo estrada boot, ne’ebé ami husu ba parte kompetente atu tau konsiderasaun tanba estrada ne’e ita hare ho matan hanesan liu de’it iha mota-laran”, nia afirma.
Oportunidade ne’e, Xefe Suku António mós preuoupa ho liña internét tanba difisíl tebes atu asesu ho l’is. “Dalaruma ita atu pasa informasaun susar uitoan, iha ne’e aldeia Molop-Taz ne’e iha fatin balun jaringa TT mak iha, Telemór laiha fali, más iha fatin balun Telemor mak iha, TT laiha fali. Ida-ne’e mak ami-nia preokupasaun, ami husu atu tau netik buat ruma para ami bele asesu imformasaun iha rai-laran no rai-li’ur”, nia sujere.
Totál populasaun iha aldeia Molop-Taz kompostu husi mane 266 no feto 257 ho totál uma-kain 123.
Notísia relevante: CVTL entrega uma temporária sanulu ba família afetada husi rai-halai iha Molop
Jornalista: Sergio da Cruz
Editora: Maria Auxiliadora
