PAM Vikeke apela ba Autoridade Suku halo kontrolu ba programa infraestutura
VIKEKE, 31 Outubru 2026 (TATOLI)—Prezidente Autoridade Munisípiu Vikeke, Francisco Cruz Simões de Gonzaga Soares, apela ba Autoridade Suku atu halo kontrolu ba programa infraestutura sira-ne’ebé implementa iha baze.
“Ha’u husu Administradór na’in-lima no Xefe Suku na’in-38 ne’e, ita-boot sira-nia papél importante ida mak asegura nafatin projetu sira-ne’ebé implementa iha suku sira. Xefe Suku sira sai mós hanesan supervizór iha baze hodi kontrola no monitoriza projetu Planeamentu Dezenvolvimentu Integradu Munisipál (PDIM) ne’ebé implementa iha bairru no suku sira,” Francisco Cruz hateten hafoin halo sorumutu ho Xefe Suku sira, iha Salaun Administrasaun Munisipál Vikeke, Sábadu ne’e.
Nia dehan, Autoridade Komunitária sira-nia obrigasaun mak tau-matan ba programa dezenvolvimentu sira-ne’ebé daudaun implementa iha baze.
“Nune’e mós, ha’u husu ba Autoridade Suku nafatin tau-matan ba programa merenda eskolár sira. Maski programa Merenda Eskolár iha munisípiu Vikeke ema seidauk kestiona maibé ita nafatin ba akompaña, atu programa merenda eskolár la’o di’ak,” nia akresenta.
Notísia relevante : Konstrusaun fatin Turizmu Istóriku Uaibua besik ramata
Autoridade Munisipál relata, orsamentu $1.071.231 aloka ba programa Merenda Eskolár tinan 2026, ne’ebé implementa iha Ensinu Báziku Sentrál (EBC, sigla portugés) hamutuk 18, Ensinu Báziku Filiál (EBF) hamutuk 77 no Ensinu Pré-Eskolár hamutuk 32, ne’ebé programa referidu benifisia ba estudante hamutuk na’in-20.487.
Enkuantu, Autoridade Vikeke iha tinan 2026 implementa projetu 14 liuhusi programa PDIM iha postu lima hanesan konstrusaun irrigasaun Laudei iha Suku Irabin de Cima, Postu Uatukarbau, konstrusaun Sentru Saúde Internamentu Uatulari iha Suku Uaitame, Postu Uatulari, konstrusaun Merkadu Bebui iha Afaloikai, Postu Uatulari, konstrusaun armazein agrikultura iha Suku Uma Uain Kraik, Postu Vikeke Vila, konstrusaun fatin turizmu istóriku iha Baneho, Postu Ossu, no konstrusaun Postu saúde iha Suku Loiulu, PostuUatukarbau.
Reabilitasaun fatin turizmu Weluli Manas iha Suku Uaimori, Vikeke Vila, konstrusaun Eskola Pré-Eskolár Kakatua Lugasa iha Suku Uma Uain Leten, Postu Vikeke Vila, konstrusaun irrigasaun ho distánsia kilómetru 2 iha Suku Bahatata, Postu Uatukarbau, no konstrusaun fatin turizmu We-Tasi iha Suku Ahik, Postu Lakluta.
Konstrusaun Postu Saúde Baulale iha Suku Irabin de Baixu, Postu Uatukarbau, konstrusaun irrigasaun Lafaek Hasan iha Suku Bibileo, Postu Vikeke Vila, konstrusaun fatin turizmu Didimerab iha Suku Vessoru, Postu Uatulari no konstrusaun irrigasaun Aenau ho distánsia kilómetru 2-resin iha Ossorua, Postu Ossu.
Obra PDIM 14 ne’e ho orsamentu alokadu $3.273.924,28, ne’ebé obra hirak ne’e iha faze implementasaun la’o hela.
“Tanba ne’e, Xefe Suku sira tenke kontrola beibeik, karik serbisu la la’o tenke halo karta mai munisípiu para ami orienta ekipa sira bá haree direta, la’ós ba obra PDIM no Merenda Eskolár, tantu obra sira seluk ne’ebé implementa iha baze,” nia hato’o.
Iha fatin hanesan, Xefe Suku Dilos, Postu Lakluta, Jacinto Ximenes, hateten, Administradór no Xefe Suku sira sempre haree projetu ne’ebé implementa iha terrenu.
“Obra PDIM ne’ebé implementa iha Postu Lakluta, ami sempre akompaña empreza sira-nia serbisu, maibé ami haree serbisu la’o hotu, laiha ida mak paradu. Kona-ba orientasaun parte autoridade nian ne’e ami nafatin ezekuta hodi akompaña serbisu sira tanba fó benifísiu ba ita-nia komunidade sira,” nia katak.
Jornalista : Vitorino Lopes da Costa
Editora : Julia Chatarina
