Projetu konstrusaun no reabilitasaun merkadu Maubisse atinje 35,19%
MAUBISSE, 31 Outubru 2026 (TATOLI) – Projetu konstrusaun no reabilitasaun Merkadu Maubisse, Postu Administrativu Maubisse, Munisípiu Ainaro, atinje ona progresu ezekusaun 35,19%.
Projetu ne’e hala’o husi Kompañia Lokalizaka Unipesoal Lda, ho orsamentu Estadu hamutuk $480.928,37.
Projetu ne’e lansa iha Juñu 2026 no tuir planu, sei konklui iha Fevereiru 2027.
Enjineiru responsavel ba konstrusaun no reabilitasaun merkadu ne’e, Jaimito Tilman Gusmao dos Reis, esplika katak obra ne’e inklui konstrusaun edifísiu merkadu foun no reabilitasaun ba edifísiu tuan ne’ebé eziste ona.
Projetu ne’e mós inklui konstrusaun estrutura no barreira iha fatin haat, nune’e mós sistema drenajen bee.
Aleinde ne’e, projetu ne’e inklui konstrusaun hariis-fatin haat, kompostu husi hariis-fatin feto rua no mane rua.
Jaimito hateten katak autoridade governu kontinua halo monitorizasaun ba ezekusaun obra, inklui responsavel projetu iha Munisípiu Ainaro, ne’ebé realiza inspesaun dala tolu kada semana.
Nia salienta katak kooperasaun di’ak entre kompañia no Governu Lokál ajuda fasilita no aselera prosesu ezekusaun projetu ne’e.
Jaimito mós konfirma katak traballadór hotu ne’ebé envolve iha obra ne’e sidadaun Timoroan.
Enkuantu, reprezentante Administrasaun Postu Administrativu Maubisse, Claudino Mendonça, dehan katak Merkadu Maubisse iha importánsia boot ba komunidade no komersiante lokál sira, tanba sai nu’udar sentru prinsipál ba atividade komersiál no fonte rendimentu ba família barak.
Nia esplika katak merkadu ne’e la’ós de’it simu komersiante husi Maubisse, maibé mós husi munisípiu seluk, inklui Manufahi, Ainaro no Kovalima.
“Situasaun ne’e hatudu katak Merkadu Maubisse iha papél importante iha movimentu ekonomia no komérsiu entre munisípiu sira,” Claudino dehan.
Ho progresu obra ne’ebé to’o ona 35,19%, komunidade no komersiante lokál sira hein katak projetu ne’e sei hadi’a infraestrutura merkadu no kria ambiente komersiál ne’ebé seguru, konfortável no apropriadu, atu suporta dezenvolvimentu ekonomia lokál.
Jornalista: Camilio de Sousa
Editór: Filomeno Martins
