Embaixadór Alberto Carlos klarifika imajen enkontru ho Governadór NTT

Foto hamutuk entre delegasaun Timor-Leste ne’ebé lidera husi Embaixadór Timor-Leste ba Indonézia, Alberto X.P. Carlos, ho Governador NTT, Viktor Laiskodat iha ámbitu enkontru entre parte sira ne’ebé hala’o iha Palacio Governador NTT iha Kupang, Timor Osidentál, segunda (10/08). Imajen/Embaixada TL ba RI

DILI, 11 agostu 2020 (TATOLI) – Embaixadór Repúblika Demokrátiku Timor-Leste (RDTL) ba Repúblika Indonézia, Alberto X.P. Carlos, klarifika imajen ka foto hasoru malu ho Governadór Nusa Tengara Timur (NTT), Viktor Laiskodat, iha Palásiu Governadór NTT nian iha Kupang, Timor Osidentál, segunda (10/08).

Imajen ne’e mak viral iha rede Sosial Facebook tanba Embaixadór Alberto X.P. Carlos kaer liman ho hakru’uk ba Governador NTT, Viktor Laiskodat. Imajen/Espesiál gardaindonesia.id

Embaixadór Alberto X.P Carlos, hateten, imajen ka foto ne’e hasai iha situasaun insidente ida. Katak momentu hasoru malu ne’e, embaixadór preparadu hato’o kumprimentu de’it liuhusi símbolu COVID-19 (taka liman no hakru’uk).

Nia hateten, momentu hakaruk ho saudasaun COVID-19 nian, governadór diretamente lolo-liman atu kaer-liman, iha momentu ne’e kedas no nia sente admiradu no la preparadu hodi lolo mós liman de’it ona hasoru Governadór Viktor Laiskodat.

“Ami komunikasaun kle’ur ona atu bele hasoru malu, maibé la iha oportunidade no horiseik mak tempu oportunu ami hasoru malu. Ha’u tama ba Palásiu Governadór nian, ha’u uza máskara tanba COVID-19. Ha’u tama ho preparadu taka liman hato’o salam COVID-19, mas derrepente Governadór Viktor Laiskodat, lolo-liman mai halo ha’u hakfodak no atrapalla kaer de’it nia liman ona. Horikalan, ha’u haree fali foto ka imajen iha www.gardaindonesia.id, ha’u hakfodak,” haktuir Embaixadór Alberto X.P. Carlos, ba Agência Tatoli, ohin, hodi halo klarifikasaun ba imajen ne’ebé parte rua hasoru malu no viral tiha iha rede sosiál Facebook.

“Ha’u atrapalla tanba Governadór lolo fali liman mai ne’e. Tuir loos la’ós kaer liman, maibé ema ne’e lolo tiha ona liman mai. Ne’ebé halo ha’u atrapalla uitoan,” Embaixadór Alberto Carlos hateten tan.

Delegasaun Timor-Leste ne’ebé lidera husi Embaixadór Timor-Leste ba Indonézia, Alberto X.P. Carlos, halo enkontru ho Governador NTT, Viktor Laiskodat iha Palacio Governador NTT iha Kupang, Timor Osidentál, segunda (10/08). Imajen/Embaixada TL ba RI

Iha enkontru entre parte-rua ne’e ko’alia asuntu lubuk ida, liuliu oinsá halo planu no fortalese kooperasaun entre Timor-Leste ho Indonézia iha liña fronteira nian no oinsá mak kolabora malu luta hasoru propagasaun surtu Coronavirus ka COVID-19.

“Ha’u iha Indonézia tinan haat ona no ami seidauk hasoru malu no Governadór Viktor Laiskodat, husu ami rua hasoru malu atu troka ideia kona-ba oinsá atu iha kooperasaun di’ak entre Timor-Leste no Timor Osidentál. Governadór fó hanoin, ita bele iha kooperasaun iha área peska, ita mós iha aeroportu Oe-Cusse bele aproveita ka manfaatkan. Buat sira-ne’e mak ami ko’alia,” informa Embaixadór Alberto Carlos.

Jornalista : Francisco Simões

Editór : Rafy Belo