DILI, 19 agostu 2020 (TATOLI)-Ministériu Saúde liuhosi Komisaun Ezekutivu Saúde ba Surtu COVID-19, iha kuarta ne’e fó livre ona sidadaun Indonézia ida ne’ebé izola iha fatin izolamentu Sentru Saúde Vera Cruz Dili tanba rezultadu teste COVID-19 dala rua tutuir malu negativu ka di’ak ona husi moras corona virus.
“Depois konferénsia imprensa ne’e sei hasai nia husi sala izolamentu hodi lori bá nia-uma orsida ekipa saúde mak sei akompaña sidadun estranjeiru ne’e,” informa Koordenadora Jerál Komisaun Ezekutivu Saúde ba Surtu COVID-19, Odete da Silva Viegas, iha konferénsia imprensa, iha Palacio das Sinzas Caicoli.
Notísia Relevante :Timor-Leste rejista kazu foun ida ba COVID-19
Pasiente ne’e konfirmadu pozitivu iha loron 04 fulan-agostu hodi submete kedas ba iha izolamentu, iha loron hanesan ekipa saúde halo teste dala rua tutuir malu rezultadu pozitivu.
Iha loron 8 to’o 12 fulan-agostu halo tan teste ba dala-rua no rezultadu sei kontinua pozitivu, pasiente ne’e ninia kondisaun saúde la hatudu sintoma hanesan isin manas, mear.
Teste ikus dala-rua tutuir malu iha loron 14 fulan-agostu no iha loron 17 fulan hanesan hatudu rezultadu negativu tanba rekupera ona.
”Dala ida tan hakarak apela ba públiku bainhira Ministériu Saúde seidauk fó informasaun ne’ebé mak ofisiál hanesan daudaun konferénsia imprensa signifika ema moras sira-ne’e seidauk sai no rumoris sira ne’ebé mak espalla katak Ministériu Saúde fó-sai ona ne’e laloos,” tenik Odete.
Entretantu, Sidadaun mane ne’e maihusi Java Sentrál Indonézia ho aviaun Citilink to’o iha Kupaun, Nusa Tenggara Timur (NTT) iha loron 21 fulan-jullu no iha loron 22 fulan hanesan tama iha territóriu Timor-Leste liuhosi fronteira terrestre Motain, Munisípiu Bobonaro.
Notísia Relevante :Pasiente pozitivu COVID-19 foun izola ona iha Vera Cruz
Tuir dadus, ema na’in 105 maka la’o hamutuk ho pasiente konfirmadu ho idade 46 ne’e bainhira tama mai territóriu TL iha fulan kotuk.
Jornalista : Felicidade Ximenes
Editór : Agapito dos Santos
