DILI, 04 dezembru 2020 (TATOLI)–Asisténsia Finansa no Administrasaun ILO ba Spotlight Inisiative Preject, Domingos Natividade, hateten violénsia doméstika no asédiu sai ameasa boot iha mundu traballu nian iha mundu tomak inklui Timor-Leste ba igualdade oportunidade.
“Violénsia no asédiu iha mundu traballu nian, sai ameasa ba igualdade oportunidade, inaseitável ka inkompatível ho traballu desente, abuzu ba direitu umanu, no afeta ba ema-nia saúde, dignidade no ambiente familiár no sosiál. Ida-ne’e, bele impede ema partikularmente feto sira atu asesu no avansa iha merkadu traballu,” Domingos Natividade ba jornalista sira, bainhira partisipa workshop nasionál ne’ebé ho tema “Mandatu Global hodi Hapara Violénsia no Asédiu iha Mundu Trabalhu”, iha salaun Yayasan HAK, Farol, Dili, sesta ne’e.
Nia hatutan, violénsia no asédiu, komportamentu no prátika inaseitável lubun ida ka ameasa ne’ebé akontese dala ida de’it ka beibeik, ne’ebé kauza ka bele kauza danu fíziku, psikolójiku, seksuál ka ekonómiku, no inklui violénsia no asédiu bazea ba jéneru afeta ho forma disproporsionalidda feto no labarik-feto sira.
Nia hateten, ema hotu iha direitu ba mundu traballu ida ne’ebe livre hosi violénsia no asédiu, inklui violénsia no asédiu bazea ba jéneru, oportunidade istórika hodi define futuru ba trabalhu bazea ba dignidade no respeitu.
Jornalista : Osória Marques
Editór : Cancio Ximenes
