DILI, 14 jullu 2021 (TATOLI)—Governu foti ona desizaun hodi kontinua taka provizóriu postu integradu fronteira terrestre entre Timor-Leste (TL) ho Repúblika Indonézia (RI), durante semana rua, hahú hosi sábadu 10 jullu to’o sábadu 24 jullu 2021.
Governu hola desizaun ne’e, relasiona ho kazu konfirmadu COVID-19 variante Delta ne’ebé daudaun ne’e rejistu makás iha Indonézia.
Notísia relevante:PNTL lansa viñeta ba transporte iha fronteira terrestre
“Despaixu ne’e asina hosi Ministru Interiór atuál Primeiru-Ministru, Taur Matan Ruak, hodi deside taka provizóriu postu integradu fronteira Terrestre,” Komunikadu ne’ebé Agéncia Tatoli asesu, kuarta ne’e.
Liuhosi despaixu númeru 084/MI/VII/2021, ne’ebé publika iha Jornál Repúblika iha 09 jullu 2021, Governu deside taka provizóriu postu fronteira terestre hodi evita risku propagasaun, tanba konsidera variante COVID-19 variante Delta iha poténsia atu fó perigu tebes ba ema nia-saúde.
Postu integradu fronteira terrestre nafatin funsiona iha loron segunda no kuarta entre tuku 09:00 to’o tuku 1:00, oras meiudia ba de’it atividade merkadoria hanesan transaksaun nesesidade bázika kontinua tama no transaksaun iha zona livre internasionál TL-RI.
Kona-bá sirkulasaun internasionál autoriza autoriza de’it atu tama bainhira ho razaun fundamentál ba intrese públiku no apoiu umanitária.
Jornalista: Nelson de Sousa
Editór: Cipriano Colo
