DILI, 27 jullu 2021 (TATOLI)—Aban, Timor-Leste (TL) sei simu tan doasaun vasina AstraZeneca hamutuk doze 50.000 hosi Governu Austrália.
“Vasina hirak-ne’e aban sei to’o TL, no ita sei kobre iha territóriu,” Ministra Saúde, Odete Maria Freitas Belo, hateten ba jornalista Agência Tatoli, iha Parlamentu Nasionál (PN), tersa ne’e.
Notísia relevante:Aban TL simu tan AstraZeneca doze rihun 65 hosi Austrália
Tuir tarjetu hosi Ministériu Saúde katak, sei lori rekursu hotu-hotu ba iha munisípiu, la’ós atu kobre hotu, maibé atu bele hasa’e kobertura liu 50 ka 60%, iha semana rua oin mai.
Iha fatin hanesan, Embaixadór Austrália iha Timor-Leste, Peter Roberts, hateten vasina ne’ebé aban Governu Austrália sei haruka mai, nu’udár kompromisu atu suporta programa vasinasaun iha TL.
“Ha’u kontente tebes no ami mós prontu nafatin atu serbisu hamutuk ho TL iha futuru,” Peter Roberts, hateten.
Jornalista: Felicidade Ximenes
Editór: Cipriano Colo
