DILI, 28 jullu 2021 (TATOLI) – Prezidente Komisaun Reguladóra Arte Marsiál (KRAM), Octaviano da Conceição, informa rezultadu hosi sosializasaun re-ativa atividade arte marsiál durante ne’e hala’o iha baze lao di’ak tebes.
“Sosializasaun sira durante ne’e ami halo iha baze ho autoridade lokál sira, komunidade-sira hatudu rezultadu pozitivu, katak arte marsiál iha sosiedade hanesan arte ida, nune’e Governu tenke tau importánsia atu re-ativa hikas,” Octaviano da Conceição, informa ba Agência Tatoli iha Dili, kuarta ne’e.
Nia fundamenta katak prezensa arte marsiál sira-nian importante mós ba nasaun nia dezenvolvimentu iha área desportu, maibé tenke lao tuir lei ne’ebé iha.
Polítika Sekretáriu Estadu Juventude no Desportu (SEJD) atu re-integra atividade arte marsiál iha sosiedade hodi enkuadra ba modalidade desportu. Nune’e, iha fulan hirak liubá KRAM halo kontrata ho kompañia konsultóriu no advokasia JU,S hodi halo servisu oinsá mak atu elabora lei sira ne’ebé mak bele di’ak ba atividade arte marsiál sira iha Timor-Leste.
Rezultadu hosi ezersísiu JU,S nian iha faze elaborasaun no tempu besik sei finaliza hodi SEJD submete ba Konsellu Ministru hodi halo aprovasaun.
Organizasaun ne’ebé daudauk ne’e seidauk re-ativa mak hanesan PSHT, Kera Sakti (IKS) no KORK.
PSHT sei realiza kongresu nasionál
Hosi sorin seluk, Prezidente Komisaun Organizadora Kongresu PSHT, Ambrosius Arnol Mau hateten, sábadu (31/07), PSHT sei realiza kongresu nasionál hodi prienxe rekizitu KRAM kona-ba re-ativa atividade arte marsiál sira.
“Preparasaun ami nian 90% ona, Kongresu ida ne’e atu prienxe rekizitu KRAM nian. Kongresu ida-ne’e, ami reforsa de’it kongresu ne’ebé ami halo ona iha 2009,” nia hateten.
Kongresu ne’ebé hala’o sei partisipa hosi membru-sira iha territóriu nasionál, kada munisipiu ho reprezentante na’in rua no total kongresista hamutuk na’in-200.
Kongresu ne’e sei loke direita hosi Primeiru-Ministru Taur Matan Ruak no membru Governu balu no daudaun ne’e total membru PSHT iha Timor -Leste hamutuk rihun 50-resin.
Jornalista : Hortencio Sanchez
Editór : Francisco Simões
